AQShning US ITER loyihasi Fransiyaning Kadarach shahrida qurilayotgan xalqaro termoyadro reaktori uchun markaziy solenoid qismlarini yetkazib berishni yakunladi. So'nggi jo'natma elektr ulanishlari uchun shinalar va tok o'tkazgichlarni o'z ichiga oldi. Bu haqda Ixbt.com xabar beradi.
Markaziy solenoid balandligi 18 metr va kengligi 4,25 metr bo'lgan ulkan magnit tizimi bo'lib, oltita alohida moduldan iborat. Har bir modulning og'irligi 122,5 tonnadan oshadi va taxminan 6 kilometr o'ta o'tkazuvchan kabeldan o'ralgan.
Ushbu magnit tizimining umumiy og'irligi qariyb 3000 tonnani tashkil etadi.
Markaziy solenoidni ishlab chiqarish Kaliforniyadagi General Atomics zavodida 15 yil davom etdi. Hozirgi vaqtda ITER obyektida beshta modul yig'ilgan bo'lib, so'nggi modul keyinroq qo'shiladi.
Yig'ish ishlari yakunlangach, konstruksiya reaktor ishlashi davomida ulkan kuchlarga bardosh berishi uchun maxsus ramka bilan qisiladi.
ITER eksperimental qurilma bo'lib, uning asosiy vazifasi elektr energiyasi ishlab chiqarish emas, balki boshqariladigan termoyadro sintezi imkoniyatini isbotlashdir. US ITER vakillarining ta'kidlashicha, ushbu loyihaning yakunlanishi butun jahon termoyadro energetikasi dasturi uchun muhim qadam hisoblanadi.
“Zamin”ni Telegramʻda oʻqing!
