Маълумки, Вазирлар Маҳкамасининг 2025 йил 28 февралдаги 130-сон қарорига мувофиқ, педагог кадрларни аттестациядан ўтказиш тартиби такомиллаштирилди, деб Ta’lim xabarlari сайти хабар берди.
Қарорга асосан, 2025 йил 1 сентябрдан бошлаб барча педагоглар ҳар 5 йилда аттестация тест синовларига жалб қилиниши белгилаб қўйилди ва умрбод малака тоифаси бериш амалиёти бекор қилинди.
Бироқ 2025 йил 1 сентябрга қадар қуйидаги талабларга жавоб берадиган педагоглар мажбурий аттестациядан озод этилади ва уларга амалдаги малака тоифаси (лавозими) бўйича ҳақ тўлашда давом этилади:
– олий малака тоифаси (бош ўқитувчи лавозими) ни 15 йил давомида узлуксиз сақлаб келганлар;
– педагогик фаолият бўйича 25 йил ёки ундан ортиқ иш стажига эга бўлганлар;
– пенсия ёшига чиқишига 5 йил ёки ундан кам вақт қолганлар;
– пенсия ёшига тўлган ва педагогик фаолият билан шуғулланаётганлар.
Шу талаблардан бирортасига жавоб берадиган педагогларга амалдаги малака тоифаси тўғридан-тўғри берилади ва 1 сентябрдан кейин ҳам улар аттестациядан ўтмайдилар.
Бироқ юқоридаги талабларга жавоб бермайдиган педагоглар кейинчалик ҳатто 15 йиллик тажрибага, пенсия ёшига етганига қарамасдан, ҳар 5 йилда мажбурий аттестациядан ўтишлари талаб этилади.
Қонунчиликка кўра, 2025 йил 1 сентябрдан сўнг амалдаги нормалар орқага қайтиб қўлланилмайди ва фақатгина ушбу санадан кейин юзага келадиган муносабатларга тааллуқли бўлади.
Шунингдек, 2025 йил 1 сентябргача юқоридаги талабларга жавоб берган педагогга фақат малака тоифаси муддати тугаганидан кейин яна шу тоифа расман қайта берилади ва умрбод сақланади.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
