Андижон чорраҳасида 4 машина иштирокида ЙТҲ рўй берди

Андижоннинг Шаҳрихон туманида 4 та автомобил иштирокида йўл-транспорт ҳодисаси юз берди. Вилоят ЙҲХБ маълумотига кўра, бу воқеа 16 ноябрь куни “Тараққиёт” маҳалласидаги чорраҳада содир бўлган.

Маълум қилинишича, 1994 йилда туғилган ҳайдовчи С.С. Cobalt машинасини бошқариб кетаётганда ора масофани сақламай, чапга бурилаётган бошқа бир Cobalt’га бориб урилган. Зарба таъсирида иккинчи Cobalt қарама-қарши йўналишдан келаётган Nexia-3 билан тўқнашган.

Шу билан вазият янада кескинлашган: Nexia-3 ҳайдовчиси руль назоратини йўқотиб, чорраҳада тўхтаб турган Damas’га келиб урилган.

Ҳодиса оқибатида бирор киши жароҳат олмаган ва транспорт воситаларнинг техник шикасти ҳам жиддий эмаслиги билдирилди. Ҳолат юзасидан суриштирув ишлари олиб борилмоқда.