Тошкент вилояти Фавқулодда вазиятлар бошқармаси маълумотига кўра, кеча, 18 сентябрь куни “Қамчиқ” довонида йирик ёнғин содир бўлди. Воқеа А-373 автомобиль йўлининг “Водий–Тошкент” йўналишида қайд этилган.
Маълум қилинишича, соат 22:35 атрофида ҳаракатланаётган Volvo русумли юк автомобилининг тиркамасида олдиндан кутилмаган ёнғин келиб чиққан. Тиркама ичида қурилиш учун мўлжалланган турли маҳсулотлар бўлган ва улар қисқа вақт ичида алангага йўлиққан.
Фавқулодда вазиятлар хизмати тезкор равишда ҳодиса жойига йўл олган. Ёнғин-қутқарув бригадалари 22:47 да манзилга етиб келган ва узоқ саъй-ҳаракатлардан сўнг олов соат 23:42 да тўлиқ бартараф этилган.
Ҳодиса сабаблари ва етказилган моддий зарар ҳозирда мутахассислар томонидан ўрганилмоқда. Энг асосийси, ҳодиса вақтида инсонлар жабрланмагани қайд этилмоқда.
Мутахассислар таъкидлашича, юк автомобилларида хавфсизлик чораларига қатъий амал қилиш, техник ҳолатни доимий назорат қилиш ва эҳтиёт чораларини кучайтириш бу каби нохуш ҳолатларни олдини олишда муҳим аҳамиятга эга.
«Замин»ни Telegram’да ўқинг!
