Фото: Йўл ҳаракати хавфсизлиги хизмати
Бухоро вилоятида хавотирли ҳолат аниқланди — маст ҳолда транспорт бошқариб, ўнлаб болалар ҳаётини хавф остига қўйган ҳайдовчи тўхтатилди.
Йўл ҳаракати хавфсизлиги хизмати маълумотига кўра, воқеа 2026 йил 28 апрель куни Ромитан туманида содир бўлган. ЙПХ ходимлари текширув давомида Isuzu русумли автобусни тўхтатиб, ҳайдовчининг маст эканини аниқлаган. Маълум бўлишича, у транспорт воситасида 40 нафар боғча боласини олиб кетаётган бўлган.
Шунингдек, ҳайдовчи йўл-патруль хизмати ходимларининг қонуний талабларига ҳам бўйсунмагани қайд этилган. Ҳолат юзасидан унга нисбатан маъмурий баённома расмийлаштирилиб, қонун доирасида жазо тайинланган.
Қарорга кўра, у 3 йил муддатга транспорт бошқариш ҳуқуқидан маҳрум этилди ҳамда 16 миллион 480 минг сўм миқдорида жаримага тортилди.
Айтиш жоиз, бу каби ҳолатлар сўнгги вақтларда бошқа ҳудудларда ҳам кузатилмоқда. Жумладан, Самарқанд ва Андижон вилоятларида ҳам болаларни меъёрдан ортиқ ҳолда ташиш ҳолатлари аниқланиб, ҳайдовчиларга нисбатан чора кўрилган.
Мутахассислар бу каби қоидалар бузилиши болалар хавфсизлигига жиддий таҳдид солишини таъкидлаб, назоратни кучайтириш зарурлигини қайд этмоқда.
“Zamin”ни Telegram'да ўқинг!
