Наманганда рашк қурбони бўлган 11-синф қизининг аянчли қисмати

Наманган вилоятининг Косонсой туманида юз берган мудҳиш воқеа кенг жамоатчиликни ларзага солди. Рашк оқибатида йигит ўзи билан унаштирилган, 11-синфда таҳсил оладиган севгилисини пичоқлаб, унинг ҳаётига нуқта қўйди.

Дастлабки маълумотларга кўра, фожеа жорий йилнинг 6 май куни соат тахминан 08:30 атрофида Косонсой тумани “Ёшлик” МФЙ, Навобот кўчасида содир бўлган. Йигит рашк сабабли унаштирилган севгилиси билан ўзаро тортишиб қолган. Шундан сўнг у қизни ўлдириш ниятида ёнида бўлган пичоқ билан унинг кўкрак ҳамда қорин қисмига бир неча бор зарба берган ва ҳодиса жойидан яширинган.

Оғир тан жароҳатлари олган қиз шифохонага олиб борилганига қарамай, шифокорлар унинг ҳаётини сақлаб қола олмаган. У шифохонада вафот этган.

Ҳодиса ҳақида хабар келиб тушгач, воқеа жойига тезкор-тергов гуруҳи етиб борган. Ҳудуд атрофлича кўздан кечирилиб, далилий ашёлар расмий тартибда олинган ва тегишли экспертизалар тайинланган.

Мазкур ҳолат юзасидан Косонсой туман прокуратураси томонидан йигитга нисбатан Жиноят кодексининг 97-моддаси 1-қисми — қасддан одам ўлдириш айби билан жиноят иши қўзғатилди. Шунингдек, у Жиноят-процессуал кодексининг 221-моддасига мувофиқ тартибда ушланган.