Президент Шавкат Мирзиёев Самарқанд–Ургут янги темир йўл линиясининг қурилиш жараёнини кўздан кечирди. Ушбу лойиҳа жорий йил охирига қадар фойдаланишга топширилиши режалаштирилмоқда, деб хабар берди давлат раҳбари матбуот хизмати.
Янги темир йўл линиясининг умумий узунлиги 55 километр бўлиб, Ургут эркин иқтисодий зонасида икки йўловчи ва икки юк ташиш станциясини, шунингдек, бир неча кўприкларни ўз ичига олади. Келгусида линия тўлиқ электрлаштирилиши кўзда тутилган.
Лойиҳанинг амалга оширилиши натижасида линияда икки жуфт шаҳарлараро ва тўққиз жуфт юк поезди қатнови йўлга қўйилади. Бу эса йилига 359 минг йўловчини ва 8,2 миллион тоннагачалик юкни ташишга имкон яратади.
Темир йўл линияси Самарқанд, Жомбой, Пастдарғом, Тойлоқ ва Ургут туманларида яшовчи аҳоли учун замонавий ва хавфсиз транспортни таъминлаш, ички туризмни ривожлантириш ҳамда Ургут эркин иқтисодий зонасининг ўсишига хизмат қилади. Президент янги линия бўйлаб Ургутгача саёҳат қилиб, темир йўл инфратузилмасини янада ривожлантириш бўйича қўшимча топшириқлар берди.
Хусусан, электрлаштиришни жадаллаштириш, йўловчилар учун қулайликларни ошириш, темир йўл атрофидаги ҳудудларни ободонлаштириш ва рақамли технологияларни жорий қилиш масалаларига алоҳида эътибор қаратилди. Шунингдек, давлат раҳбари иқтисодий ўсишга тўсқинлик қилаётган логистика муаммоларини бартараф этиш муҳимлигини алоҳида таъкидлади.
Меҳмон гуруҳидаги фойдаланувчилар ушбу мақолага изоҳ қолдира олмайди.
