Жиззах вилоятида қурилишда бирга ишлаб юрган икки таниш ўртасида ичкиликдан кейин жанжал чиқиб, оғир оқибатга олиб келди. Воқеа 2025 йил 13 июль куни соат 17:00 атрофида Жиззах вилояти Шароф Рашидов туманида содир бўлган.
Суд материалларига кўра, 1980 йилда Сирдарё вилоятида туғилган эркак таниши билан спиртли ичимлик ичган. Кейин улар ўртасида келишмовчилик пайдо бўлиб, можаро авж олган. Жанжал пайтида у ошхона пичоғи билан танишининг қорин ва кўкрак соҳаларига зарба бериб, қасддан оғир тан жароҳати етказган.
Иш Жиззах вилояти жиноят ишлари бўйича Зардор туман судида кўриб чиқилди. Судланувчи айбига иқрор бўлиб, пушаймонлигини айтган ва енгил жазо сўраган.
Суд жабрланувчи ва гувоҳлар кўрсатмалари, иш ҳужжатларини ўрганиб, айбланувчининг 4 нафар фарзанди борлиги ва мавсумий ишчи эканини ҳам инобатга олди. Натижада у 3 йил муддатга озодликдан маҳрум қилинди, жазони умумий тартибдаги колонияда ўтайди.
“Zamin”ни Telegram'да ўқинг!
