Ўзбекистонда 2030 йилга қадар аҳолининг ўртача умр давомийлигини 78 ёшга етказишга қаратилган катта лойиҳа ишлаб чиқилди. Бу режа мамлакатдаги тиббиёт соҳасидаги ислоҳотларни янада чуқурлаштириш ва аҳолининг саломатлигини яхшилашга бўлган эҳтиёждан келиб чиққан. Янги стратегияга кўра, 2026 йилгача бу кўрсаткич 75,5 ёшга, 2027 йилгача 76 ёшга, 2028 йилгача эса 76,8 ёшга етиши кутилмоқда. 2029 йилга келиб, ушбу рақам 77,5 ёшга чиқади, ва 2030 йилга келиб 78 ёшга етказиш мақсад қилинган.
Бунинг учун соғлиқни сақлаш соҳасига ажратиладиган маблағлар 2030 йилга қадар умумий ички маҳсулотнинг 5 фоизига етказилиши режалаштирилган. Бундан ташқари, аниқ мақсадлар қўйилган, жумладан:
-юрак-қoн томир касалликларидан эрта ўлимни 30-69 ёшда 27 фоизга камайтириш;
-саратон касаллигидан эрта ўлимни 30-69 ёшда 5,2 фоизга камайтириш;
-қандли диабет билан касалланган беморларни даволашни 100 фоизга кўпайтириш;
-нафас йўллари касалликларидан эрта ўлимни 30-69 ёшда 1,5 фоиздан ошмаслигини таъминлаш;
-сил касаллиги билан касалланиш даражасини 33 фоиздан кўпроқ бўлмаслигини таъминлаш.
Миллий статистика қўмитасининг маълумотларига кўра, Ўзбекистонда аҳолининг ўртача умр кўриш давомийлиги келгусидаги динамикаси қуйидагича бўлган:
-1991-йилда — 66,4 ёш;
-1995-йилда — 69,1 ёш;
-2000-йилда — 70,8 ёш;
-2005-йилда — 71,8 ёш;
-2010-йилда — 73 ёш;
-2015-йилда — 73,6 ёш;
-2020-йилда — 73,4 ёш;
-2023-йилда — 74,7 ёш;
-2024-йилда — 75,1 ёш.
Президент Шавкат Мирзиёев 2025 йилнинг августида Мустақиллик куни муносабати билан байрам тантанасида сўзга чиқар экан, охирги йилларда тиббиёт соҳасига ажратилаётган маблағлар 6 баробар ошганини ва аҳолининг турмуш шароитлари яхшилангани натижасида ўртача умр кўриш давомийлиги 73,8 ёшдан 75,1 ёшга узайганини таъкидлаган. Бу ўзгаришлар Ўзбекистонда аҳоли саломатлигини таъминлаш ва ҳаёт сифатини ошириш борасидаги катта ишлар қилинганини кўрсатади.
“Zamin”ни Telegram'да ўқинг!
