Рақобат қўмитаси икки сайёҳлик компаниясини ноқонуний реклама учун жаримага тортди. Panorama Travel ва Шаффоф Кичиксой компаниялари ижтимоий тармоқларда умра зиёратини ташкил этиш хизматларини лицензиясиз реклама қилгани аниқланган.
Шунингдек, Telegram каналлари — Umra Ihlos Sardor domla, Yuksak Ahsan Travel ва Express Parvoz Миллий сайёҳлик оператори эгалари ҳам реклама қонунчилигини бузганлик учун жавобгарликка тортилган. Эслатиб ўтамиз, ўтган йил кузидан бошлаб ҳукумат зиёрат хизматларини таклиф қилувчи сайёҳлик компаниялари фаолиятини тартибга солишни бошлаган.
Рухсатнома олиш учун компания "Зиëрат" фондига 1 миллион доллар маблағ йўналтириши талаб этилади. Дастлабки босқичда 12 та компанияга иш фаолияти учун рухсатнома берилган, жорий йил баҳорида эса яна икки компания лицензияга эга бўлган.
Ёзда Дин ишлари бўйича қўмита сайёҳлик операторларини яширин текшириш қоидаларини тасдиқлаган. Мазкур текширувлар доирасида қўмита ходимлари мижоз сифатида компаниялар офисларига бориб, хизматлар муддати ва нархларини аниқлашади.
Меҳмон гуруҳидаги фойдаланувчилар ушбу мақолага изоҳ қолдира олмайди.
