Ўзбекистон Соғлиқни сақлаш вазирлиги «Электрон рецепт» тизимини босқичма-босқич жорий этади. Бу тизим дастлаб Тошкент шаҳрида ҳамда 15 та тажриба ҳудудида амалиётга қўшилади.
Бу ҳақда вазирлик матбуот хизмати хабар берди. Вазирлик мурожаатлар ва таклифларни ҳисобга олган ҳолда янги тизимга ўтишни имкони борича тушунарли ва силлиқ амалга ошириш учун қўшимча чоралар кўрмоқда.
Шунингдек, вазирликда мутахассислар ва тегишли ташкилотлар вакиллари билан ишчи учрашувлар ўтказилди. Учрашув натижасида янги тизимни жорий этиш масалаларини ҳафталик кўриб чиқиш ва кейинги босқичлар бўйича таклифлар тайёрлаш учун эксперт кенгаши ташкил этилди.
Дастлаб, электрон рецепт антибиотиклар, синтетик антибактериал воситалар ва тизимли таъсирга эга гормон препаратлари учун мажбурий бўлади. Келгуси босқичлар учун дори воситалари рўйхати тиббий аҳамият ва ижтимоий хавфлилик даражаси ҳисобга олинган ҳолда алоҳида тасдиқланади.
Вазирлик тиббий ва фармацевтик ташкилотларнинг тизимга уланиши бепул амалга оширилишини, шунингдек, электрон рецептларни ёзиш ҳуқуқи фақат шифокорларга тегишли бўлиб қолишини таъкидлади. Ўтиш даврида айрим ва шошилинч ҳолатларда қоғоз рецептлардан фойдаланиш имконияти сақланиб қолади.
Вазирликнинг қайд этишича, босқичма-босқич жорий этиш тизимни мунтазам равишда такомиллаштириш, даволаниш хавфсизлигини таъминлаш, дори воситалари айланишини тартибга солиш ва аҳоли учун қулайлик яратишга хизмат қилади. Маслаҳатларга оид саволлар бўйича 1003 рақамли кечаю кундуз фаолият юритувчи call-марказга мурожаат қилиш мумкин.
Меҳмон гуруҳидаги фойдаланувчилар ушбу мақолага изоҳ қолдира олмайди.
