Aйшу ишpaт гиpдoби

Эрталаб ишхонасига, кечки пайт уйига талпинган одамни бахтиёр дейдилар. Чунки севимли машғулоти билан банд, оиласи тинч, дили пок, ҳалол меҳнат қилиб барака топади, ҳурмат қозонади. Аксинча, бирон жойда ёлчитиб ишламаган, енгилтабиат, нафси-ю ҳирсини жиловлай олмаган кимсанинг бири икки бўлмайди. Судланувчиларнинг учаласи ҳам расман ишламаган. Ҳар хил йўллар билан топган пулини айшу ишратга сарфлашган.

Марғилонлик йигирма етти яшар Кимсанбек (исм-фамилиялар ўзгартирилган) уйланганидан кейин ҳам ўзини жиловлаб олмади. Қўшни давлатдан кўчиб келиб қолган, оиласидан ажрашган, ўзидан етти яшар катта Роҳила деган аёл билан дон олишиб юради. Март ойининг сўнгги кунларидан бирида кечқурун Фарғона шаҳридаги кўпқаватли уйда турадиган Роҳиланинг хонадонига кириб келади. Аёл бу кеча бандман дея уни ётоғидан чиқиб келган Шалола билан таништиради. Сўнг «Онамдан хабар олишим керак» дейди.

Кимсанбекнинг машинасида учаласи «Иссиқ нон» корхонасига боришади. Дўкондан харид қилган озиқ-овқатни Роҳила кўпқаватли уйда яшайдиган онасига бериб чиқади. Кимсанбек Роҳилани уйига элтиб қўяди. Тун яримлаганда Шалола билан Роҳиланикига қайтиб боришади. У ёлғиз эмас, бошқа бир хуштори Диёрбек билан эди. Иккаласини уйига киритади. Уларга ошхонага жой солиб беради. Ўзи хуштори билан ётоғида «дам олади». Диёрбек тун ярмидан ўтганида уйга бормасам бўлмайди дея чиқиб кетади. Соат тунги учларда Кимсанбек Роҳилани ётоғига кириб уйғотади.

– Ҳа, нима гап бемаҳалда?
– Уни ўлдириб қўйдим!
Роҳила ошхонага чиқади. Жасад устига кўрпа ташланган эди.
– Нима қилиб қўйдинг? Нимага, нима учун?
– Ҳамиятимга тегди. Ёмон сўкиниб, жаҳлимни чиқарди.
– Энди нима бўлади? Тамом, уйим куйди. Уйни олиб қўйишса, кўчада қоламан.
– Уни олиб кетаман, биров билмайди. Кўрпага ўраб, машинага юклайман. Каналга ташлаб юбораман…
– Тонг отиб қолди. Кўрганларга нима дейсан? Йўқ, ҳозир тегма. Кечаси, ҳамма ухлаганда олиб кетасан.

Кимсанбекнинг қораси ўчгач, Роҳила хушторига «Тез етиб келинг» деб қўнғироқ қилди. Ошхонадаги жасадни кўриб Диёрбекнинг капалаги учди.
– ИИБга хабар бериш керак.
– Бўлмайди, уйимни олиб қўйишади. Кимсаннинг ўзи жасадни йўқ қилади. Кейин хабар қиламиз.
Диёрбек фоҳишаникига келиб-кетиб юргани ошкор бўлиб хотини билан қўйди-чиқди бўлишини кўз олдига келтирди-ю мум тишлади.

Кечқурун соат ўн яримда Кимсанбек қўнғироқ қилиб машинасида етиб келди. «Ҳали эрта, – деди уни Диёрбек билан қарши олган Роҳила. – Тун яримласин, кейин». Кимсанбек ортига қайтди. Роҳила Диёрбек билан уйнинг атрофини бир-икки айланишди. Унинг машинасида кутиб ўтиришди. Қайтиб келган Кимсанбек «Қарашвор, бир ўзим кўтара олмайман» деди. Роҳила кўнмади. Кимсанбек кўрпага ўралган жасадни бир амаллаб кўчага олиб чиқди. Жасад юкхонага сиғмади. Уни орқа ўриндиққа ётқизиб жўнади. Роҳила Диёрбек билан уйига кириб, ошхонадаги қон доғларини, пичоқни артиб, тозалаб қўйди.

Ўша тунда, соат бирларда Тошлоқ тумани ИИБ профилактика инспектори жамоатчи ёрдамчи билан Катта Фарғона канали теварагини назорат қилишга чиққан эди. Кўприкка яқинлашиб келаётган енгил машинага қарата машинасининг чироғини ёқиб қўйди. Йўл бўйида туриб яқинлашган машина ҳайдовчисига четга чиқиб тўхташни ишора қилди. Кимсанбек тушиб келиб сўрашди. Рулга қайтиб ўтириб ҳужжат излагандай бўлди. «Йўқ экан, уйда қолдирибман» деди. «Орқа ўриндиқдаги нима?» дея сўради инспектор. Пойинтар-сойинтар сўзларидан шубҳаланиб, қўлини рулга кишанбанд қилиб қўйгач, Кимсанбекнинг ростини айтишдан ўзга иложи қолмади. Инспектор дарҳол навбатчи қисмга қўнғироқ қилди.

Марҳум эндигина 18 ёшга тўлганди. Фаҳш йўлига кириб қолганининг билвосита сабаби оиладаги муҳитга, ўсмирлигидан бошлаб ўз ҳолига ташлаб қўйилганига бориб тақалади. Марҳумнинг онаси қизи тез-тез уйидан чиқиб кетиб, бир неча кундан кейин қайтиб келган пайтларда ўртага олиб дакки беришлари кор қилмаганини, фоҳишалик қилаётганини эшитгани, танобини тортиб, қаттиқ турганларида фалокатнинг олди олинган бўлиши мумкинлигини айтиб, афсус-надоматда куйиб ёнади.

Қисман иқрорлигидан ташқари қотилнинг айби гувоҳларнинг кўрсатмалари, далиллар билан тасдиқланди. У ўн икки йилга озодликдан маҳрум этилди. Дарҳол хабар бермасдан жиноятни яширган Роҳила ва Диёрбекка озодликни чеклаш жазоси тайинланди.


Манба: Huquq.uz «Замин»ни Telegram’да ўқинг!