АЭС төңірегіндегі келіспеушілік: Мәскеу АҚШ ұсынысынан бас тартты

Мәскеу Украинадағы жанжалды шешу үшін АҚШ тарапынан ұсынылған Запорожье атом электр станциясын (ЗАЭС) Америка бақылауына беру ұсынысына қарсы екенін білдірді.

Бұл туралы Reuters ақпарат агенттігінің дереккөздеріне сілтеме жасап хабарлады.

Мәлім етілгендей, Вашингтон ұсынған жоспарға сәйкес, Запорожье атом электр станциясы АҚШ бақылауына беріліп, онда өндірілген электр энергиясы Ресей мен Украина арасында тең бөлінуі көзделген.

Дегенмен, дереккөздердің айтуынша, Ресей бұл нысанның тек Мәскеу бақылауында қалуын қатаң талап етіп отыр. Сонымен қатар, Украина тарапы да бұл бастаманы қабылданбайтын ұсыныс ретінде бағалап отыр.

Reuters дереккөздеріне қарағанда, әзірге аумақтық мәселе де ашық күйінде қалып отыр. Украина бейбіт келісімнің шарттарын, соның ішінде аумақтарға қатысты тармақты референдум арқылы шешуге ниетті екенін білдірді.