Мемлекеттік қауіпсіздік қызметінің Науаи облысы бойынша басқармасы мен ішкі істер органдарының қызметкерлерімен бірлесіп атыс қарулары мен оқ-дәрілердің заңсыз айналымына қарсы күрес бағытында Канимех ауданында жедел іс-шара өткізілді.
Шара барысында Бұхара облысының Гиждуван ауданында тұратын, 1989 жылы туған адамға тиесілі "Оникс" маркалы автокөлік тексерістен өтті. Тексеру барысында автокөліктің жүксалғышынан 5,6 мм калибрлі, атысқа жарамды 500 дана оқ табылып, белгіленген тәртіпте рәсімделді.
Жедел шара мұнымен тоқтаған жоқ. Құқық қорғау органдарының қызметкерлері тексеруді жалғастырып, осы адамның тұрғылықты үйінен заңсыз сақталған тағы 600 дана 5,6 мм калибрлі оқ-дәрілерді заттай айғақ ретінде тәркіледі. Жалпы 1100 дана оқ-дәрі тәркіленгені айтылды.
Қазіргі уақытта бұл тұлғаға қатысты Қылмыстық кодекстің 248-бабы 3-бөлігі бойынша қылмыстық іс қозғалып, оған "қамауға алу" шарасы қолданылды. Қазіргі уақытта тергеу амалдары жүргізілуде.
Естеріңізге сала кетейік: тиісті лицензия немесе рұқсатсыз атыс қаруын, оның негізгі бөліктерін және оқ-дәрілерді құқық қорғау органдарына ерікті түрде тапсырған азаматтар заңға сәйкес жауапкершіліктен босатылуы мүмкін.
“Zamin”-ді Telegram-нан оқыңыз!
