Өзбекстанда цифрлық қызметтер одан әрі ыңғайлы болып, халық үшін жаңа мүмкіндіктер жасалуда. Енді азаматтар өздеріне тиесілі мобиль телефон нөмірін басқа тұлғаның атына қашықтан, онлайн түрде аудара алады. Бұл туралы MyGov порталы ресми түрде хабарлады.
Бұрын мұндай процесс көп уақыт пен күш-жігерді талап ететін. Яғни, нөмір иесін өзгерту үшін қолданыстағы иесі мен жаңа пайдаланушы бірге мобиль оператор кеңсесіне баруы, кезек күтуі және құжаттарды сол жерде қол қоюы міндетті еді. Енді бұл кезеңдердің барлығы цифрландырылып, бірнеше кезеңде онлайн түрде жүзеге асырылады.
Қызметті пайдалану процесі қарапайым: азамат My.gov.uz порталына немесе MyGov мобиль қосымшасына кіріп, «Мобиль нөмірді қайта ресімдеу» бөлімі арқылы өтініш жіберуі керек. Қажетті мәліметтер енгізілген соң, өтініш растау үшін жіберіледі.
Маңызды жайт — процесске екі тарап та қатысады. Яғни, нөмірді аударып жатқан тұлға да, оны қабылдап жатқан азамат та MyID жүйесі арқылы Face-ID растауынан өтуі шарт. Бұл қауіпсіздік пен ашықтықты қамтамасыз етеді.
Өтініштер әдетте 1 күннен 5 күнге дейінгі мерзімде қаралады. Қазіргі уақытта бұл қызметті Uztelecom, Beeline және Mobiuz абоненттері пайдалана алады. Жақын уақытта басқа операторлар да бұл жүйеге кезең-кезеңімен қосылуы жоспарлануда.
Төлем мәселесіне келсек, қызмет құны әр оператордың тариф саясатына қарай қалыптасады. Кейбір жағдайларда, атап айтқанда жақын туыстар арасында нөмірді аудару тегін жүзеге асырылуы мүмкін.
Қысқасы, жаңа қызмет арқылы артық әуре-сарсаң мен уақыт жоғалтуларға тосқауыл қойылуда. Бұл цифрлық Өзбекстанға тағы бір қадам десек, артық болмас.
“Zamin”-ді Telegram-нан оқыңыз!
