Елімізде мемлекеттік тәуелсіздіктің 35 жылдығына орай ірі мәдени-ағартушылық жоба — «Тәуелсіздік тойы» фестивалін өткізу жоспарлануда. Бұл ауқымды іс-шара ағымдағы жылдың мамыр айынан қыркүйек айына дейін еліміздің барлық өңірлерін қамтиды.
Фестиваль «Біртұтас Отан, біртұтас халық болып, жаңа өмір мен болашақ құрамыз!» ұранымен ұйымдастырылып, отандастар арасындағы бірлікті, патриотизмді және ұлттық құндылықтарға деген құрмет сезімін нығайтуға бағытталған.
Аталған мәдени-ағартушылық бастама Республикалық Руханият және ағарту орталығы, Өзбекстан махаллалары қауымдастығы, Мәдениет министрлігі, Жастар істері агенттігі, «Маърифат» насихатшылар қоғамы және басқа да бірқатар мемлекеттік және қоғамдық ұйымдардың серіктестігімен жүзеге асырылады.
Фестиваль аясында оннан астам әлеуметтік, рухани және мәдени жобаларды іске асыру көзделген. Бұл жобалар арқылы халықтың түрлі топтары, әсіресе жастар арасында ұлттық идеялар мен заманауи дамуға қатысты көзқарастар үйлестіріледі.
Мәлім етілгендей, аталған фестиваль туралы Республикалық ұйымдастыру комитетінің отырысында егжей-тегжейлі ақпарат берілді. Іс-шаралар бағдарламасы әр өңірдің өзіндік ерекшелігі мен мәдени дәстүрлерін ескере отырып әзірленеді.
Еске сала кетейік, бұл бастама алғаш рет Президенттің Өзбекстан тәуелсіздігінің 35 жылдығын лайықты атап өтуге арналған қаулысында алға тартылған болатын. Фестиваль тек мерекелік атмосфера жасап қана қоймай, қоғамда жаңа идеялар мен мақсаттарды насихаттауға қызмет етеді деп күтілуде.
