Өзбекстандық шебер мотоблок пен «Жигулиден» жаңа техника жасады

Әлеуметтік желілерде мотоблок пен ескі «Жигули» көлігінің бөлшектерін біріктіру арқылы жасалған ерекше ауыл шаруашылығы техникасы бейнеленген видео қызу талқыланды. Оны жасаған шебер бұл өнертабыстың шаруалар үшін арзан әрі ыңғайлы шешім болатынын айтып, тапсырыс бойынша өзгелерге де жасап беретінін мәлімдеді.

Видеодан техниканың алдыңғы бөлігі кәдімгі екі дөңгелекті мотоблоктан, ал артқы бөлігі «Жигулидің» шанағы мен орындықтарынан құрастырылғанын көруге болады. Бұл құрылым ауыл жағдайында жүк тасымалдауды және дала жұмыстарын жеңілдету мақсатында жасалған.

Видео авторы шебердің өнерін жоғары бағалап, мұндай өнертабыстың көпшілікті таңғалдыратынын айтты. Ал өнертапқыш техниканың іс жүзінде тиімділігін дәлелдегенін айтып, қызығушылық танытқандарға осындай көлік жасап беруге дайын екенін мәлімдеді.