Ресейдің «Космос 2581» және «Космос 2583» жерсеріктері орбитада өте дәл жақындасу маневрін орындады. Ғарыш нысандарын бақылайтын COMSPOC компаниясының мәліметінше, 28 сәуірде бұл құрылғылар бір-бірінен небәрі 3 метр қашықтыққа дейін жақындаған. Мамандар бұл қозғалыстың кездейсоқ емес екенін және жерсеріктер тұрақты конфигурацияны сақтау үшін бірнеше рет түзетулер енгізгенін атап өтуде. Бұл туралы Ixbt.com хабарлайды.
Талдаулар операцияға тек осы жұп қана емес, сонымен қатар «Космос 2582» жерсерігі мен «Космос 2583»-тен бөлініп шыққан Object F атты кубсат та қатысқанын көрсетті. Барлық нысандар 2025 жылдың ақпанында «Союз» зымыранының көмегімен ғарышқа ұшырылған болатын. COMSPOC бақылауына сәйкес, бұл құрылғылар төменгі Жер орбитасында өзара үйлестірілген маневрлерді алғаш рет жасап отырған жоқ.
Жақындасу барысында «Космос 2582» топтан 100 шақырымнан аз қашықтықта артта қалса, Object F құрылғысы «Космос 2582»-ден 15 км және «Космос 2581»-ден 10 км қашықтықта қозғалған. Мамандардың пікірінше, Ресей бұл операциялар арқылы бір уақытта бірнеше нысанды басқару және олардың өзара әрекеттесуін қамтамасыз ету бойынша озық орбиталық технологияларды сынақтан өткізуде.
“Zamin”-ді Telegram-нан оқыңыз!
