Өзбекстан Республикасы Олий Мажлисінің Адам құқықтары жөніндегі уәкілі баспасөз қызметінің мәліметіне сәйкес, 31 қазан күні Ферғана облысында «Әйелдер мен балаларды қолдау орталығының» ресми ашылу салтанаты өтті. Бұл орталық «Меҳржон» үкіметтік емес ұйымы тарапынан ұйымдастырылған.
Жоба БҰҰның Даму бағдарламасы және Әділет министрлігінің көмегімен жүзеге асырылған «Заң үстемдігін нығайту және адам құқықтарын қорғау» арнайы бағдарламасы аясында іске асырылды. Жаңа орталық зорлық-зомбылық құрбандарына уақытша баспана ұсынумен қатар, оларға психологиялық, әлеуметтік және құқықтық көмек көрсетеді.
Сондай-ақ, мекемеде отбасылық дауларды шешу, зорлықтан зардап шеккендерді әлеуметтік бейімдеу және әйелдер мен балалардың әлеуметтік белсенділігін арттыруға бағытталған арнайы іс-шаралар өткізіледі. Айта кету керек, биыл Омбудсмен тарапынан «Теңдік пен құрмет» платформасы іске қосылған болатын, оның аясында гендерлік теңдікті қамтамасыз ету және зорлық құрбаны болған әйелдерді жан-жақты қолдауға бағытталған қажетті шаралар жүзеге асырылуда.
