Шавкат Мирзиёев шағын бизнес субъектілері үшін қолайлы экономикалық және әкімшілік ортаны қалыптастыруға бағытталған ұсыныстармен танысты. Онда қоғамдық тамақтану және қонақүй қызметтері саласына қатысты бірқатар жеңілдіктер талқыланды.
Тұсаукесер барысында кафе, мейрамхана және қонақүйлерде алкоголь мен темекі өнімдерін қолма-қол ақшаға сатуға рұқсат беру ұсынысы алға тартылды. Сонымен қатар, қосылған құн салығының бір бөлігін қайтаруда қолма-қол ақшасыз түсім үлесі бойынша қолданыстағы талапты жою бастамасы да қаралды.
Бұдан бөлек, кейбір қызметкерлерді жеңілдетілген тәртіппен ресімдеу мүмкіндігін жасау жоспарлануда. Бұл шаралар қызмет көрсету саласындағы шағын бизнес үшін әкімшілік жүктемені жеңілдетуге және қызметті заңды жүргізуді ынталандыруға қызмет ететіні атап өтілді.
Мәліметтерге сәйкес, ұсынылып отырған өзгерістер 600 мыңнан астам шағын бизнес субъектілерінің заңды өсу мүмкіндіктерін кеңейтуі мүмкін. Салық базасының ашықтығы арқылы бюджетке жылына кемінде 2 триллион сум қосымша қаражат түсуі болжануда.
Шавкат Мирзиёев ұсынылған жобаларды мақұлдап, шағын бизнес үшін әділ және қолайлы жағдай жасау, салық әкімшілігін жеңілдету және цифрландыру арқылы кәсіпкерлер қызметін кеңейту бойынша жауаптыларға тапсырмалар берді.
Естеріңізге сала кетейік, Өзбекстанда 1 сәуірден бастап 28 мың түрлі тауар мен қызмет тек банк немесе карта арқылы сатыла бастаған еді. Қолма-қол ақшаға сатылмайтын 22 мың түрлі өнімнің басым бөлігі алкоголь және темекі өнімдеріне тиесілі.
Сондай-ақ, Фаррух Пулатов 21 сәуір күні Сауда-өнеркәсіп палатасында өткен ашық сұхбатта мейрамхана мен қонақүйлерде алкоголь үшін қолма-қол ақша төлеуге рұқсат беру бойынша жаңа тәртіп әзірленетінін хабарлаған болатын. Онда кәсіпкерлер туристермен жұмыс істеу барысында қолма-қол ақшасыз төлем себебінен қиындықтарға тап болып жатқанын білдірген еді.
“Zamin”-ді Telegram-нан оқыңыз!
