Олий Мәжіліс Сенатының жалпы отырысында «Жергілікті мемлекеттік билік туралы» Өзбекстан Республикасының Заңына өзгерістер мен толықтырулар енгізу туралы заң жобасы қаралды. Жаңа Өзбекстанда халық билігін толыққанды жүзеге асыру және мемлекеттік басқарудағы жергілікті өкілді органдардың рөлін арттыру реформалардың басым бағыты ретінде белгіленді. Бұл туралы Uzdaily.uz хабарлайды .
Жаңа заңмен жергілікті Кеңестер қызметін жүйелі ұйымдастыру және атқарушы билік үстінен парламенттік бақылауды күшейту көзделген. Атап айтқанда, халық депутаттарының жергілікті Кеңестерінде Кеңес төрағасының орынбасары институты енгізілуде. Бұл лауазым иесі Кеңес хатшылығына басшылық етеді және аппараттың жергілікті атқарушы биліктен тәуелсіз болуын қамтамасыз етеді.
Сондай-ақ, жергілікті Кеңестер қызметінің үздіксіздігін қамтамасыз ету мақсатында Кеңес Төралқасы құрылуда. Төралқа құрамына Кеңес төрағасы, оның орынбасары, тұрақты комиссиялардың төрағалары және саяси партиялар топтарының жетекшілері кіреді. Бұл орган сессиялар аралығындағы жұмыстарды тиімді үйлестіру міндетін атқарады.
Тағы бір маңызды жаңалық – «Кеңес сағаты» институтының енгізілуі. Енді депутаттар жергілікті мемлекеттік органдар мен ұйымдар басшыларын тыңдауға және халықты толғандырып отырған өзекті мәселелер бойынша жедел жауап алу мүмкіндігіне ие болады. Сенат мүшелері бұл заң жергілікті билік жүйесіндегі демократиялық тепе-теңдікті қамтамасыз етуде маңызды құқықтық негіз болатынын атап өтіп, құжатты мақұлдады.
“Zamin”-ді Telegram-нан оқыңыз!
