Қатарда, Доҳа шаҳрида шахматнинг рапид ва блиц йўналишлари бўйича жаҳон чемпионати давом этмоқда. Блиц турнири ғолиби норвегиялик гроссмейстер Магнус Карлсен бўлди.
Ҳал қилувчи финал баҳсида Карлсен ўзбекистонлик Нодирбек Абдусатторовни 2,5:1,5 ҳисобида енгиб, чемпионликни қўлга киритди. Финал учрашуви кескин ва муросасиз кураш остида ўтди, бир неча партия вақт назорати кескин чекланган шароитда ўйналди.
Блиц форматида ҳар бир ўйинчига 3 дақиқа вақт берилади ва ҳар юриш учун 2 сониядан қўшиб борилади. Бундай тезкор режим юқори диққат, тез ҳисоб-китоб ва қарор қабул қилишни талаб этади.
Абдусатторов турнир давомида босқичларни ишончли тарзда босиб ўтиб, финалгача етиб келган Ўзбекистоннинг ягона вакили бўлди. Унинг бу натижаси чемпионатнинг энг эътиборли чиқишларидан бири сифатида қайд этилди.
Карлсен учун эса Доҳадаги ғалаба тезкор шахматдаги етакчилигини яна бир бор тасдиқлади. У рапид ва блиц бўйича жаҳон биринчиликлари тарихидаги энг кўп совриндор шахматчилардан бири бўлиб қолмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
