«Фенербаҳче»нинг собиқ футболчиси Линколн жамоани 2024–2025 йилларда бошқарган португалиялик мураббий Жозе Моуринё ҳақида кескин фикр билдирди. Бу ҳақда euro-football.ru хабар беради.
Линколннинг айтишича, Моуринё унга берган ваъдасини бажармаган ва ҳурматсизлик қилган. Футболчи ижара асосида «Халл Сити»га кетишидан олдин мураббий билан гаплашгани, Моуринё эса уни ёзги йиғинга Португалияга чақиришини билдирганини таъкидлади.
Мавсум якунида у йиғинга чақирув кутган, бироқ мураббий билан боғланмоқчи бўлганида Моуринё суҳбатдан бош тортган. Линколн таржимон орқали қўнғироқ қилганини, лекин Жозе уни спорт директори билан гаплашишга йўналтирганини айтди.
Футболчи жамоа Португалияда бўлган пайтда ўзи ҳам Португалияда уйида турганини, шунга қарамай Моуринё уни Истанбулга қайтариб, алоҳида шуғулланишни буюрганини қўшимча қилди. Унинг фикрича, бу ҳолат адолатсиз ва ҳурматсиз муносабат бўлган.
Линколн «Фенербаҳче»да кўплаб учрашувларда клубга ёрдам бериш учун борини берганини, баъзан ўз позициясида бўлмаса ҳам майдонга тушганини эслатди. Шунингдек, оғир жароҳатдан кейин қўллаб-қувватлаш кутганини, аммо буни ҳис қилмаганини қайд этди.
У Fanatik нашрига берган интервьюсида, юлдуз футболчилар қаторида бўлмаса ҳам, ҳар доим майдонда максимум ишлаганини таъкидлади.
Ҳозирда Жозе Моуринё «Бенфика»ни бошқармоқда.
“Zamin”ни Telegram'да ўқинг!
