Клопп агенти қизиқишлар ҳануз камаймаганини айтди

Юрген Клоппнинг агенти Марк Косицке немис мутахассисининг фаолиятини давом эттириш бўйича имкониятлари ҳақида фикр билдирди. 2023/24 мавсум якунида “Ливерпул”даги мураббийлик ишини якунлаган Клопп ҳозирда Red Bull тизимида футбол бўлими бўйича глобал раҳбар лавозимида ишламоқда. Бу ҳақда euro-football.ru хабар беради.

Косицкенинг Transfermarkt нашрига айтишича, Red Bullга ўтишидан аввал Клопп АҚШ ёки Англия терма жамоаларини бошқариши мумкин эди. Агентнинг таъкидлашича, агар Германия терма жамоасида Юлиан Нагелсманн бўлмаганида, бу йўналиш ҳам эҳтимолий вариант сифатида кўрилган.

Шунингдек, Косицке “Челси” ва “Манчестер Юнайтед”дан ҳам таклифлар бўлганини маълум қилди. Бироқ Клопп бошқа инглиз клубида ишламаслигини аниқ билдирганига қарамай, агент сўзларига кўра, бундай қизиқишлар барибир йўқолмаяпти.

Клопп “Ливерпул”ни 2015 йил октябридан 2024 йил майигача бошқарган. Унинг қўл остида “қизиллар” узоқ танаффусдан сўнг Англия чемпионлигини қўлга киритди, ЕЧЛ финалига уч бор чиқди ва турнирни бир марта ютди.

Sardor Ergashev

«ZAMIN.UZ» муҳаррири