«Ман Сити»нинг собиқ ҳужумчиси Пол Диков жамоанинг янги юлдузи Райан Шерки ва мураббий Пеп Гвардиола ўртасидаги мураккаб муносабатлар ҳақида гапирди. Унинг сўзларига кўра, франциялик плеймейкер ўзининг эркин ўйин услуби билан мураббийни гоҳ ҳайратга солади, гоҳ ғазаблантиради. Бу ҳақда Goal.com хабар беради.
Шерки «Лион» клубидан 34 миллион фунт стерлинг эвазига сотиб олинган эди. 22 ёшли футболчи Манчестер клуби билан 2030 йилгача мўлжалланган шартнома имзолаган.
Мутахассислар унинг трансферини жамоа учун жуда фойдали келишув деб баҳоламоқда.
Гвардиола одатда майдонда қатъий тартиб ва тактик интизомни талаб қилади. Бироқ Шерки Роналдиньо ёки Неймар каби кутилмаган ҳаракатлар қилишни хуш кўрадиган ижодкор футболчилар сирасига киради.
Унинг «Арсенал»га қарши финал ўйинидаги финтлари мутахассислар ўртасида қизғин баҳсларга сабаб бўлди.
Диковнинг таъкидлашича, Гвардиола футболчининг меҳнатсеварлигини юқори баҳолайди. Шерки «Ман Сити» асосий таркибида қолиш учун майдонда бор кучи билан ҳаракат қилиши кераклигини яхши тушунади.
Бу эса мураббийнинг унга бўлган ишончини оширмоқда.
Жорий мавсумда Райан Шерки барча мусобақаларда 10 та гол урди ва 13 та голли узатмани амалга оширди. Ҳозирда жамоа Англия кубоги финалига чиққан ва Премьер-лигада чемпионлик учун курашни давом эттирмоқда.
“Zamin”ни Telegram'да ўқинг!
