"Барселона" клуби ёзги трансфер ойнасида "Атлетико" ҳужумчиси Хулиан Алваресни сотиб олиш бўйича дастлабки музокараларга киришди. Каталонияликлар аргентиналик жаҳон чемпионини жамоани эркин агент сифатида тарк этиши кутилаётган Роберт Левандовскининг ўрнига асосий номзод сифатида кўрмоқда. Бу ҳақда Goal.com хабар беради.
ESPN хабарига кўра, 26 ёшли ҳужумчи "Ривер Плейт" ва "Ман Сити"даги фаолияти давомида ҳам скаутлар назоратида бўлган. Бироқ трансфер осон кечмайди, чунки Алвареснинг шартномасида 500 млн евро миқдорида товон пули белгиланган ва Мадрид клуби уни камида 120 млн еврога баҳоламоқда.
Левандовскининг келажаги эса Италия билан боғланмоқда. Келаси мавсумда 38 ёшга тўладиган польшалик ҳужумчига "Ювентус" ва "Милан" клублари қизиқиш билдирмоқда.
Унинг маоши қисқариши ва захира ўриндиғига ўтиши ҳақидаги таклифлар футболчини қониқтирмаяпти.
Алвареснинг агенти Фернандо Идальго футболчининг оиласи Каталониядан уй қидираётгани ҳақидаги хабарларни рад этди. У бу маълумотларни мутлақо ёлғон деб атади ва оила аъзолари охирги марта Барселонада фақат ўйин куни бўлганини таъкидлади.
Ҳужум чизиғини кучайтириш учун "Барселона" бошқа вариантларни ҳам кўриб чиқмоқда. Хусусан, ижарада ўйнаётган Маркус Рашфорд ва "Реал Бетис" вингери Абде Эззалзули номзодлари ўрганилмоқда.
Шунингдек, Ферран Торреснинг сотилиши молиявий ҳолатни яхшилашга ёрдам бериши мумкин.
“Zamin”ни Telegram'да ўқинг!
