Россияда фирибгарларнинг янги ҳийласи кенг тарқалмоқда. Бунда жиноятчилар жабрланувчининг банк картасига маълум миқдорда пул ўтказиб, сўнгра мессенжерлар орқали боғланишади. Бу ҳақда Ixbt.com хабар беради.
Улар гўёки адашганликларини айтиб, маблағни бошқа реквизитларга қайтаришни сўрашади.
Эксперт Галактион Кучаванинг тушунтиришича, бундай пуллар деярли ҳар доим учинчи шахслардан ўғирланган бўлади. Агар фойдаланувчи маблағни кўрсатилган ҳисобга ўзи ўтказиб берса, у билмаган ҳолда жиноий занжир иштирокчисига айланади.
Натижада унинг маълумотлари шубҳали операциялар базасига тушади.
Бундай ҳолатда банклар мижознинг барча ҳисоб рақамлари ва карталарини блоклаш ҳуқуқига эга бўлади. Блокланган маблағларга киришни тиклаш эса фақат банк бўлимига шахсан бориш орқали амалга оширилади.
Бу эса фуқаро учун ортиқча муаммолар ва ҳуқуқий хавфларни келтириб чиқаради.
Мутахассислар хавфсизликни таъминлаш учун пулни мустақил равишда қайтармасликни тавсия қилади. Энг тўғри йўл — дарҳол банкнинг расмий рақамига қўнғироқ қилиш ва ўрнатилган тартибда қайтариш жараёнини расмийлаштиришдир.
Бу усул фирибгарлик схемаларига аралашиб қолишдан ҳимоя қилади.
“Zamin”ни Telegram'да ўқинг!
