Юрген Клоппнинг агенти Марк Косицьке немис мутахассисининг кейинги фаолияти бўйича бўлган вариантлар ҳақида фикр билдирди. «Ливерпул»нинг собиқ бош мураббийи 2023/24 йилги мавсум якунида лавозимини тарк этгач, ҳозирда Red Bull тизимида футбол йўналиши бўйича глобал раҳбар сифатида ишламоқда. Бу ҳақда euro-football.ru хабар беради.
Косицьке Transfermarkt нашрига берган интервьюсида, Red Bullга ўтишдан олдин Клопп АҚШ ёки Англия терма жамоасини бошқариши мумкин бўлганини таъкидлади. Унинг сўзларига кўра, Юлиан Нагельсманн бўлмаганда, Германия терма жамоаси варианти ҳам эҳтимолдан холи эмас эди. Шунингдек, «Челси» ва «Манчестер Юнайтед»дан ҳам таклифлар келган, бироқ Клопп Англияда бошқа клубни бошқармаслигини очиқ айтганига қарамай, бундай мурожаатлар барибир тўхтамаяпти.
Клопп «Ливерпул»ни 2015 йил октябридан 2024 йил майигача бошқарди. Унинг даврида мерсисайдликлар узоқ танаффусдан сўнг Англия чемпиони бўлди, UEFA Чемпионлар лигаси финалига уч марта чиқди ва бир бор ушбу турнирда ғолибликни қўлга киритди.
“Zamin”ни Telegram'да ўқинг!
