Япониянинг СофтБанк Груп корпорацияси Франция ҳудудида маълумотлар марказлари қувватини кенгайтириш учун 75 миллиард еврогача (тахминан 87 миллиард доллар) инвестиция киритишини эълон қилди. Компаниянинг асосий мақсади 5 гигаваттгача бўлган қўшимча маълумотлар маркази қувватини яратиш ва уларни бошқаришдан иборат. Бу ҳақда Techcrunch.com хабар беради.
Режанинг биринчи босқичида Дюнкерк (Лун-Плаж), Боскел ва Бушен шаҳарларида янги объектлар қурилади. Ушбу лойиҳалар 2031-йилга қадар О-де-Франц минтақасига 3,1 гигаватт қувват етказиб бериши кутилмоқда. OpenAI компаниясининг ҳам инвестори, ҳам мижози ҳисобланган СофтБанк ушбу лойиҳани ўзининг Европадаги энг йирик сунъий интеллект инфратузилмаси инвестицияси деб атади.
Франция иқтисодиёт вазири Роланд Лескуре ушбу келишувни президент Эмманюэль Макроннинг Францияни сунъий интеллект қиймат занжирида етакчи давлатга айлантириш борасидаги интилишларининг исботи эканлигини таъкидлади. Бу қадам мамлакатнинг технологик салоҳиятини оширишда муҳим аҳамият касб этади.
АҚШда маълумотлар марказлари қурилишига нисбатан экологик хавотирлар ва электр тармоқларига юклама ортиши сабабли қаршиликлар кучайиб бораётган бир пайтда, СофтБанк глобал кенгайишда давом этмоқда. Аввалроқ компания Огаё штатида 9,2 гигаваттли табиий газ станцияси орқали ишлайдиган йирик маълумотлар марказини қуриш режаларини ҳам маълум қилган эди.
“Zamin”ни Telegram'да ўқинг!
