Microsoft компаниясига тегишли GitHub Copilot платформасининг "олтин даври" якунига етаётганга ўхшайди. Компания ўзининг биллинг тизимини ўзгартириб, белгиланган ойлик обуна тўловидан фойдаланилган токенлар миқдорига асосланган тизимга ўтишини эълон қилди. Бу ўзгариш кичик компаниялар ва мустақил дастурчилар учун харажатларнинг кескин ошиб кетишига сабаб бўлиши мумкин. Бу ҳақда Techcrunch.com хабар беради.
1-июндан кучга кирадиган янги қоидаларга кўра, фойдаланувчилар сўровлар сонига қараб эмас, балки иш жараёнида сарфланган токенлар миқдорига қараб ҳақ тўлайдилар. Reddit ва Х каби ижтимоий тармоқларда кўплаб дастурчилар ушбу янгиликдан ҳайратда эканликларини билдиришмоқда. Масалан, бир фойдаланувчи ҳозирда ойига 29 доллар тўлаётган бўлса, янги модел бўйича унинг харажатлари 750 долларгача кўтарилиши мумкинлигини ёзган.
Бошқа бир фойдаланувчи эса ўзининг ойлик тўлови 50 доллардан қарийб 3000 долларгача ошиб кетганини кўрсатувчи скриншот билан бўлишди. Бундай кескин нарх ошиши кўпчиликни GitHub Copilot хизматидан воз кечишга мажбур қилмоқда. Дастурчиларнинг фикрича, бундай нархларда сунъий интеллект ёрдамчисидан фойдаланиш амалий жиҳатдан ўзини оқламайди.
Бироқ, ҳамма ҳам бу танқидларга қўшилмаяпти. Баъзи мутахассисларнинг таъкидлашича, агар дастурчи воситадан тўғри фойдаланса, токенлар сарфи бунчалик юқори бўлмайди. Уларнинг фикрича, астрономик ҳисоб-китоблар асосан "вибе-кодинг" билан шуғулланадиган, яни коднинг мазмунини тушунмасдан, сунъий интеллектга ҳаддан ташқари кўп ва кераксиз итерацияларни юклайдиган фойдаланувчиларда кузатилмоқда.
Шунингдек, таҳлилчилар Microsoft шу вақтгача ушбу хизмат орқали қанча зарар кўрганини муҳокама қилишмоқда. Кўринишидан, компания узоқ вақт давомида фойдаланувчиларнинг харажатларини субсидиялаб келган. Эндиликда эса Microsoft фойдаланувчиларни чатботдан тартибсиз фойдаланишга ўргатиб қўйиб, кутилмаганда нархларни ошираётгани кўплаб эътирозларга сабаб бўлмоқда.
“Zamin”ни Telegram'да ўқинг!
