AQSH Rossiyagacha yetadigan ballistik raketani sinovdan o‘tkazdi: vaziyat jiddiylashmoqda!

Amerika Qo‘shma Shtatlari 21 may kuni Kaliforniya shtatining Vandenberg aviabazasida Minuteman III qit’alararo ballistik raketasining navbatdagi rejali sinovini amalga oshirdi. Ushbu tadbir xalqaro xavfsizlik bo‘yicha vaziyat jiddiylashgan bir paytga to‘g‘ri kelgani sababli, ko‘pchilikda katta qiziqish uyg‘otdi.

Ushbu sinov uchirilishi muntazam va davriy tadbirlarning bir qismi hisoblanadi. U Qo‘shma Shtatlarning yadroviy to‘xtatish quroli XXI asr tahdidlarini jilovlashda xavfsiz, ishonchli va samarali ekanini namoyish etish hamda ittifoqchilarimizni xotirjam qilish maqsadida o‘tkazildi, deyiladi xabarda.

Deutsche Welle xabariga ko‘ra, raketa bitta maxsus jangovar kallak (Mark-21 High Fidelity De-Entry) bilan jihozlangan holda uchirilgan va taxminan 6700 kilometrlik masofani bosib o‘tgan. U Tinch okeanining markaziy qismida joylashgan maxsus raketaga qarshi mudofaa poligonida belgilangan nishonga aniq tushgan.

Minuteman III raketasi 1970 yildan beri AQSH armiyasining yadroviy strategik qurollari tizimida foydalaniladi. Bu raketaning og‘irligi taxminan 36 tonna bo‘lib, uning maksimal uchish masofasi 9500 kilometrdan ortiq, eng yuqori tezligi esa soatiga 24 ming kilometrga yetadi. Ayni paytda AQSH har biri uchtagacha yadro kallagi bilan jihozlanishi mumkin bo‘lgan 400 ta shu kabi raketalarga ega.

Amerika harbiylari bu sinov orqali yadroviy qurollarining XXI asr tahdidlariga qarshi kurashda xavfsiz, ishonchli va samarali ekanligini ko‘rsatishni, shuningdek, ittifoqchi davlatlarning xavfsizligiga ishonchini kuchaytirishni maqsad qilganini ma’lum qildi.

Qizig‘i shundaki, mazkur raketa sinovi Rossiya Xavfsizlik kengashi raisi o‘rinbosari Dmitriy Medvedevning G‘arb davlatlariga qarshi keskin bayonot berganidan bir kun o‘tib amalga oshirildi. Medvedev Peterburgdagi xalqaro yuridik forumdagi chiqishida G‘arb mamlakatlarining Rossiyaga nisbatan siyosati dunyoni yangi jahon urushiga olib borayotganini iddao qilgan edi.

Shuningdek, u Kiyevni qo‘llab-quvvatlayotgan mamlakatlarning Ukrainaga tinchlik kuchlari kiritishi, ularni Rossiya armiyasi uchun “qonuniy harbiy nishon”ga aylantirishi mumkinligi haqida keskin ogohlantirdi.

Bu esa xalqaro munosabatlardagi keskinlik yanada kuchayib borayotganidan dalolatdir. Bu vaziyatda AQSH tomonidan amalga oshirilgan raketa sinovlari harbiy-siyosiy muhitda jiddiy rezonans uyg‘otishi tabiiydir.

Zamin.uz tahririyati dunyodagi ushbu keskin vaziyatni diqqat bilan kuzatib boradi. Siz bu sinovlarni qanday baholaysiz? AQSH va Rossiya o‘rtasidagi munosabatlar yanada yomonlashadimi yoki vaziyat diplomatik yo‘l bilan hal qilinadimi? “Zamin”ni Telegramʻda oʻqing!