Quyoshda yana bir hayratlanarli kosmik hodisa kuzatildi, deb xabar berdi zamin.uz. 20 noyabr kechasi Quyoshning shimoliy qismida Yer diametridan 80 baravar katta ulkan plazma tuzilmasi shakllanib, kosmosga otilgan.
Olimlar bu ko‘tarilishni "qirol protuberansi" deb atashmoqda — chunki plazma tuzilmasining uzunligi bir million kilometrdan ham oshgan. Bunday ko‘rsatkich Quyoshda yillar davomida kamdan-kam uchraydigan gigant faollikdan dalolat beradi.
Qizig‘i shundaki, xuddi shu hududda uch kun oldin ham shunga o‘xshash kuchli plazma buluti otilib chiqqan. Mutaxassislar bu ikkala hodisa bir xil faollik markazi — 4274-raqamli hudud bilan bog‘liq bo‘lishi mumkinligini aytishmoqda.
Ayni shu mintaqa yaqinda Yerdan ko‘rinadigan holatda bo‘lib, yilning eng kuchli chaqnashlaridan ikkitasini — X5.1 va X4.0 sinfidagi portlashlarni keltirib chiqargan edi. Hozir esa u Quyoshning orqa tomonida va to‘g‘ridan to‘g‘ri kuzatib bo‘lmaydigan holda joylashgan.
Olimlar hodisani sinchiklab o‘rganmoqda. Ammo ayni paytda bu ulkan plazma chiqishi Yerga xavf solmasligi aytilmoqda — hodisa Quyoshning Yerga qarama-qarshi tomonida sodir bo‘lgan.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
