O'zbekiston delegatsiyasi rahbariyati Milliy olimpiya qo'mitasi raisi Adham Ikromov va MOQ vitse-prezidenti Otabek Umarov boshchiligida Saudiya Arabistoni poytaxti Er-Riyodga VI Islom birdamligi o'yinlari Riyod-2025 ochilish marosimida ishtirok etish uchun yetib keldi. O'zbekiston delegatsiyasi a'zolarini aeroportda Saudiya Arabistoni Olimpiya qo'mitasi Ijroiya qo'mitasi a'zosi shahzoda Abdulloh Fotih al-Saud qarshi oldi.
Iliq qabul davomida tomonlar bir-birlarini samimiy tabriklab, bunday keng ko'lamli sport tadbirida ishtirok etish muhimligini ta'kidladilar. Delegatsiya yetib kelganidan so'ng MOQ vakillari va Islom o'yinlari Tashkiliy qo'mitasi rahbariyati o'rtasida rasmiy uchrashuv bo'lib o'tdi.
Muzokaralar davomida sport sohasidagi hamkorlikni kengaytirish, yoshlar dasturlarini rivojlantirish va birgalikda o'quv-mashg'ulot yig'inlarini tashkil etish masalalari muhokama qilindi.
