Rossiya yaqin o‘n yil ichida Oyda elektr stansiyasi qurishni rejalashtirmoqda. Bu inshoot Rossiyaning Oy dasturi hamda Rossiya va Xitoy hamkorligidagi ilmiy tadqiqot markazini elektr energiyasi bilan ta’minlashi ko‘zda tutilgan. Rossiya bu loyiha orqali Oyda uzoq muddatli ilmiy faoliyat olib borishni maqsad qilgan.
Rossiya davlat kosmik agentligi Roskosmos ma’lumotiga ko‘ra, elektr stansiyasi 2036-yilgacha barpo etilishi rejalashtirilgan. Loyiha doirasida Oyda harakatlanuvchi texnika, ilmiy kuzatuv qurilmalari va tadqiqot infratuzilmasi ishlashi uchun barqaror energiya manbai yaratiladi.
Rasmiy bayonotlarda stansiya turi aniq ko‘rsatilmagan bo‘lsa-da, loyihaga Rossiyaning yadro sohasidagi yirik tashkilotlari jalb etilgani sababli u atom energiyasi asosida bo‘lishi kutilmoqda. Roskosmos rahbari Dmitriy Bakanov Oyda atom elektr stansiyasi qurish Rossiyaning muhim maqsadlaridan biri ekanini ilgari aytgan.
Mutaxassislar ushbu loyiha Rossiyaning kosmik sohadagi mavqeini mustahkamlashga qaratilganini ta’kidlashmoqda. So‘nggi yillarda AQSh va Xitoy Oy tadqiqotlarida faol bo‘lib kelmoqda. Oyda doimiy energiya manbasi yaratilishi esa Rossiyaga bir martalik parvozlardan uzoq muddatli tadqiqotlarga o‘tish imkonini berishi mumkin.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
