Kelgusi turizm mavsumi arafasida Turkiya mehmonxonalari mashhur “hammasi kiritilgan” dam olish tizimini bekor qilishni rejalashtirmayapti. Bu haqda Antaliya turizm sohasi vakillari rasman ma’lum qildi va oxirgi paytlarda tarqalayotgan mish-mishlarga oydinlik kiritdi.
Mutaxassislarning aytishicha, mamlakatda erta bron qilish kampaniyalari allaqachon start olgan. Hozircha turpaketlar narxi turistlar uchun nisbatan maqbul darajada ushlab turibdi. Biroq bozor ishtirokchilari inflyatsiyaning yuqori sur’atlari va xarajatlarning oshib borayotganini inkor etmayapti. Shu sababli, kelgusi mavsumda sayyohlar uchun raqobat yanada keskinlashishi kutilmoqda.
Turkiya turizm industriyasi hozirgi iqtisodiy sharoitlarga moslashishga majbur. Talabni saqlab qolish, xorijiy mehmonlarni jalb etish uchun yangi ishlash usullari, xizmatlar sifati va taklif formatlari ustida ish olib borilmoqda. Shunga qaramay, “hammasi kiritilgan” tizimini to‘liq bekor qilish rejada yo‘q.
Manbalar ta’kidlashicha, mazkur format haqida ommaviy axborot vositalarida vaqt-vaqti bilan paydo bo‘layotgan tanqidiy fikrlar mehmonxona egalari umumiy pozitsiyasini aks ettirmaydi. Aksincha, bu tizim hali ham Turkiya turizmining asosiy raqobat ustunliklaridan biri bo‘lib qolmoqda.
Avvalroq ayrim soha vakillari ushbu dam olish shaklining kelajagi yuzasidan turlicha fikr bildirgan edi. Xususan, Turkiya Kichik mehmonxonalar uyushmasi rahbari Erton Ustog‘lu “hammasi kiritilgan” tizimi sayyohlarni mehmonxona hududida ushlab qo‘yishi va mamlakatning madaniy, tarixiy joylari bilan tanishish imkoniyatini cheklashini ta’kidlagan.
Shunga qaramasdan, hozircha Turkiya mehmonxonalari uchun eng ommabop va talab yuqori bo‘lgan format o‘z kuchida qolmoqda. Turizm bozori esa yangi chaqiriqlarga moslashgan holda ishlashda davom etmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
