Kraken sunʼiy intellekt tufayli xodimlar sonini qisqartirdi va IPO muddatini kechiktirdi
Kripto-birja Kraken xarajatlarni kamaytirish maqsadida 150 ga yaqin xodimini ishdan boʻshatdi. Bloomberg agentligining xabar berishicha, ushbu qaror kompaniya faoliyatida sunʼiy intellekt texnologiyalarini keng joriy etish va samaradorlikni oshirish bilan bogʻliq. Bu haqda Cointelegraph.com xabar beradi.
Kompaniya vakillarining taʼkidlashicha, sunʼiy intellekt Kraken biznes jarayonlarida faol qoʻllanilmoqda, biroq hozircha qoʻshimcha qisqartirishlar rejalashtirilmagan. Ushbu oʻzgarishlar kompaniyaning AQSh fond birjasiga chiqish (IPO) rejalariga taʼsir koʻrsatib, uni 2027-yilga qadar kechiktirishi mumkin.
Joriy yilda kripto-industriyadagi kompaniyalar sunʼiy intellekt hisobiga samaradorlikni oshirish bahonasida 5 mingdan ortiq xodimni ishdan boʻshatdi. Xususan, Block Inc. fevral oyida oʻz shtatining yarmini qisqartirgan boʻlsa, Coinbase va Dune kabi yirik platformalar ham xuddi shunday choralar koʻrdi.
Kraken oʻzining IPO jarayonini oʻtgan yilning noyabrida boshlagan edi, ammo kripto-bozoridagi beqarorlik tufayli bu jarayon bir necha bor toʻxtatildi. Kompaniya hammuassisi Arjun Sethi IPO rejalarini tasdiqlagan boʻlsa-da, aniq muddatlar boʻyicha izoh bermadi.
“Zamin”ni Telegramʻda oʻqing!
