Barselona yulduzi Lamine Yamal son qismidagi jarohatdan tiklanish jarayonini davom ettirmoqda. Shu sababli, futbolchi Ispaniya terma jamoasining 2026-yilgi Jahon chempionatidagi dastlabki uchrashuvlarini o‘tkazib yuborishi kutilmoqda. Murabbiylar shtabi 18 yoshli vingerning sog‘lig‘ini xavf ostiga qo‘ymaslik uchun ehtiyotkorlik bilan yondashmoqda. Bu haqda Goal.com xabar beradi.
The Athletic xabariga ko‘ra, Yamal iyun oyida bo‘lib o‘tadigan Kabo-Verdega qarshi bahsda maydonga tusha olmaydi. Shuningdek, uning 21-iyun kuni Saudiya Arabistoniga qarshi o‘yinda ishtirok etishi ham so‘roq ostida qolmoqda. Futbolchi 26-iyun kuni Urugvayga qarshi kechadigan guruh bosqichining so‘nggi turida safga qaytishi mumkin.
Barselona va Ispaniya Qirollik futbol federatsiyasi (RFEF) vakillari futbolchining reabilitatsiya dasturi bo‘yicha muzokaralar olib borishdi. Avvalroq, Hansi Flick terma jamoa shifokorlarining yosh futbolchilarga nisbatan ehtiyotsiz munosabatidan noroziligini bildirgan edi. Yamalning sog‘ayishi Ispaniya uchun juda muhim, chunki uning maydondagi harakatlari raqib himoyasini yorib o‘tishda asosiy qurol hisoblanadi.
“Zamin”ni Telegramʻda oʻqing!
