Ommabop ochiq kodli vizualizatsiya dasturiy taʼminoti ishlab chiqaruvchisi Grafana Labs kompaniyasi kiberhujumga uchraganini tasdiqladi. Xakerlar kompaniyaning dasturiy kodlarini o‘g‘irlab, ularni tarqatib yuborish bilan tahdid qilgan holda to‘lov talab qilishgan, biroq kompaniya rahbariyati bu shantajga bo‘yin egmasligini maʼlum qildi. Bu haqda Techcrunch.com xabar beradi.
Kompaniya tomonidan olib borilgan dastlabki tekshiruvlarga ko‘ra, xakerlar GitLab muhitiga kirish imkonini beruvchi o‘g‘irlangan token orqali tizimga kirib olgan. Grafana Labs vakillarining taʼkidlashicha, ushbu token mijozlar maʼlumotlari yoki moliyaviy hisobotlarga kirish huquqini bermagan, faqat dasturiy kodlar omboriga ruxsatsiz kirishni taʼminlagan.
Hozirgi vaqtda xavfsizlik choralari kuchaytirilib, o‘g‘irlangan token bekor qilindi. Grafana Labs o‘z kodlari ochiq manbali ekanligini va ularni istalgan shaxs yuklab olishi mumkinligini eslatib o‘tdi. Shunga qaramay, kompaniya FBI tavsiyalariga amal qilgan holda, kiberjinoyatchilarga to‘lov qilmaslikka qaror qildi, chunki bu kelajakdagi hujumlarni moliyalashtirishi mumkin.
Ushbu holat yaqinda Instructure kompaniyasida yuz bergan voqeadan farq qiladi. Instructure xakerlar bilan kelishuvga erishib, to‘lov amalga oshirgan edi. Grafana Labs esa tergov jarayoni davom etayotganini va yakuniy natijalar bo‘yicha qo‘shimcha maʼlumot berilishini maʼlum qildi.
“Zamin”ni Telegramʻda oʻqing!
