Eron hukumati Hormuz boʻgʻozi orqali oʻtayotgan kemalarni nazorat qilish uchun yangi «sugʻurta modeli»ni ishlab chiqmoqda. Fars axborot agentligining xabar berishicha, Eron Iqtisodiyot vazirligi ushbu tizim orqali mamlakat budjetiga 10 milliard dollardan ortiq daromad keltirishni rejalashtirmoqda. Ushbu tashabbus doirasida kemalarga dengiz sugʻurtasi polislari va moliyaviy javobgarlik sertifikatlarini taqdim etish koʻzda tutilgan. Bu haqda Cointelegraph.com xabar beradi.
Ijtimoiy tarmoqlarda «Hormuz Safe» deb nomlangan veb-sayt orqali ushbu sugʻurta toʻlovlarini Bitcoin kriptovalyutasida qabul qilish taklif etilayotgani haqida xabarlar tarqaldi. Biroq, ushbu platformaning haqiqiyligi borasida jiddiy shubhalar mavjud va ayni damda sayt ishlamayapti. Mutaxassislar bu firibgarlik sxemasi boʻlishi mumkinligidan ogohlantirmoqda.
AQSH va Eron oʻrtasidagi keskinlik fonida Hormuz boʻgʻozi global neft savdosining beshdan bir qismini tashkil etuvchi strategik nuqta hisoblanadi. AQSH tomonidan Eron aktivlariga, xususan, Tether USDt (USDT) koʻrinishidagi mablagʻlarga nisbatan sanksiyalar qoʻllanilishi va hisob raqamlarining muzlatilishi Eronni kriptovalyutalardan foydalanishga undayotgan boʻlishi mumkin.
Avvalroq Eron neft savdosida AQSH dollari oʻrniga Xitoy yuani, Bitcoin va USDT kabi stablekoinlarni qabul qilayotgani haqida xabarlar tarqalgan edi. Shunga qaramay, hozircha Eron hukumati ushbu sugʻurta loyihasini rasman tasdiqlamadi va taklif etilayotgan mexanizmning huquqiy maqomi noaniqligicha qolmoqda.
“Zamin”ni Telegramʻda oʻqing!
