Hanuzgacha “Oskar”ga munosib koʻrilmagan Gollivud yulduzlari

Mazkur aktyor va aktrisalar taniqli rejissyorlarning mashhur loyihalarida rol oʻynaydi, lekin hozirgacha birorta “Oskar” mukofotini qoʻlga kirita olishmagan.

Margo Robbi

Gollivuddagi goʻzal qizlar koʻpincha oʻz tashqi koʻrinishlarining asiriga aylanadi. Margot Robbi bilan ham shunday boʻlgan. U ilk paytlarda faqatgina jozibali ma'shuqalar va axloqi buzuq qizlar rollarini oʻynagan.

Barchasini Martin Skorseze va uning “Uoll-strit boʻrisi” filmi oʻzgartirdi. Premeradan soʻng Robbi mashhurlikka erishadi. U dastlab kinodan ketmoqchi ham boʻlgan — mashhurlik yukini koʻtarish qiyin boʻlib tuyulgan. Ammo buning oʻrniga, aktrisa oʻzining prodyuserlik kompaniyasini tashkil etishga qaror qiladi, endi esa u imkoniyatlarni kutmasdan, ularni oʻzi yaratadi.

Robbining kompaniyasi qoʻllab-quvvatlagan filmlar kuchli ayol qahramonlar, noodatiy dramaturgiya va ayollarning dunyoqarashini aks ettiradigan asarlar bilan ajralib turardi. Bu filmlar orasida “Tonya hammaga qarshi”, “Yirtqich qushlar”, “Barbi” filmlari va “Qoʻgʻirchoq” seriali ham bor. Margo “Tonya”, “Janjal” va “Barbi” filmlaridagi rollari uchun “Oskar”ga nomzod boʻlgan, ammo hali mukofot olgan emas.

Rayan Gosling

Rayan Goslingga mashhurlikka 13 yoshidayoq erishgan — Disney Channel'dagi “Mikki Maus klubi”da Britni Spirs va Jastin Timberleyk bilan birga suratga tushgan.

Tipik Gollivud yigitiga oʻxshash tashqi koʻrinishiga qaramay, oʻsmirlik yillaridan soʻng turli xil rollarni ijro etgan: u bir necha marta neonatsist, psixopat talaba va hattoki qoʻgʻirchoqqa oshiq boʻlgan sodda yigit rolini ham oʻynagan. Goslingning butun dunyoga tanilishiga sabab boʻlgan film esa mashhur melodrama “Xotiralar daftari” edi.

Biroq unga uchta Kinoakademiya nominatsiyasini keltirgan rollar tipik romantik qahramonlar emasdi. “Yarim Nelson” filmida u giyohvandlikka mubtalo boʻlgan maktab oʻqituvchisini oʻynadi, “La-La Lend”da jazz musiqachisi Sebastyan obrazini yaratadi, u muvaffaqiyatga erishish uchun murakkab tanlovlar qilishga majbur boʻladi. “Barbi” filmida esa mallasoch qoʻgʻirchoqning doimiy hamrohi Kenni qayta ijro etib, qahramonining hayoti unchalik ham oson emasligini koʻrsatdi va mashhur komedik iste'dodini namoyish etadi.

Bill Myurrey

Bill Myurrey deyarli 100 ta filmdagi rollari bilan tanilgan, eng koʻzga koʻringanlari esa “Arvoh ovchilari” va “Sugʻur kuni” komediyalaridagi joʻshqin va oʻz bilganidan qolmaydigan obrazlaridir. 90 yillar oxirida Ues Anderson Myurreyning jiddiy obrazdagi katta tragikomik potentsialini payqaydi va uning karerasini qayta jonlantiradi. Myurrey “Rashmor akademiyasi” va “Tenenbaumlar oilasi” filmlarida suratga tushadi.

Keyinchalik Sofiya Koppola aktyorni oʻzining ikkinchi filmi — “Tarjima mashaqqati” da bosh rolga taklif qiladi. Myurreyni filmda ishtirok etishga koʻndirish uchun Koppolaga bir necha oy kerak boʻladi — chunki aktyor ommadan uzoqda boʻlishni afzal koʻradi, unga film takliflari bilan etib borish juda qiyin.

Qarib qolgan aktyorning begona ayol bilan munosabatlari haqidagi film bir zumda hitga aylandi. Bill Myurrey oʻsha paytda Sofiyaning qoʻngʻirogʻiga javob bergani bejiz emas edi. Bob Xarris roli uchun u oʻzining birinchi va oxirgi “Oskar” nominatsiyasini oladi.

Skarlett Yoxanson

Time jurnali aktrisani dunyoning eng nufuzli 100 kishisi qatoriga kiritgan, umuman olganda, Yoxansson tarixdagi eng daromadli kino yulduzlaridan biri. Biroq Kinoakademiya uning mehnatini haligacha munosib taqdirlamagan.

2020 yilda aktrisa ikkita “Oskar” nominatsiyasiga ega boʻladi: biri Drayver bilan birga “Nikoh haqidagi hikoya” uchun, ikkinchisi Tayka Vaytitining “Quyoncha Jojo” filmidagi ikkinchi plandagi roli uchun. Bu filmda u Gitler qoʻshinlariga qarshi kurashayotgan jasur ayol va bosh qahramon — Jojo ismli bolakayning onasini oʻynaydi. Yoxanssonda “Oltin sher”dan tortib BAFTA mukofotigacha boʻlgan koʻplab nufuzli mukofotlar bor, ammo haligacha “Oskar” ololmagan.

Kira Naytli

Kira Naytli yoshligidanoq aktyor boʻlgan ota-onasidan shaxsiy agent bilan ta'minlashni va kastinglarda qatnashishni talab qilgan. U ulgʻaygach, bosh rollar uchun qat'iyat bilan harakat qila boshlaydi. 2003 yilda 18 yoshli Naytli “Karib dengizi qaroqchilari” filmida suratga tushadi. Ushbu rol Kinoakademiya tomonidan tan olinmasa-da, unga katta kinoga yoʻl ochadi.

Jeyn Ostinning “Andisha va gʻurur” romani ekranlashtirilganda, aktrisa Elizabet Bennet obrazini yaratadi. Ushbu roli uchun u birinchi marta “Oskar” mukofotiga nomzod boʻladi.

Keyingi nominatsiyani Naytli “Taqlid oʻyini” filmidagi ikkinchi plandagi roli uchun oladi. U erda britaniyalik kriptograf va matematik Jon Klark obraziga kirib, Alan Tyuring bilan birgalikda natsistlarning shifrlash tizimini ochishga uringan tarixiy shaxsni oʻynaydi.

Jeyk Jillenhol

Jeyk Jillenhol rejissyor va ssenarist oilasida tugʻilgan. U 11 yoshidan filmlarda suratga tusha boshlaydi va keyinchalik kultga aylangan obrazlarni yaratadi.

Katta shuhrat va Jillenholning birinchi hamda yagona “Oskar” nominatsiyasi “Bukri togʻ” filmidagi roli tufayli keladi. Kinoakademiya bu filmni uchta “Oskar” bilan taqdirlaydi — ammo faqat rejissyura, stsenariy va saundtrek uchun.

Aktyorning ismi doimo tilga olinib kelinadi. U taniqli rejissyorlarning yirik loyihalarida suratga tushadi, ammo hozirgacha “Oskar” mukofiga munosib koʻrilmagan. “Zamin” yangiliklarini “Telegram”da kuzatib boring