Angliya Liga kubogi yarim finalining ilk uchrashuvida “Nyukasl Yunayted” o‘z maydonida “Manchester Siti”ga 0:2 hisobida mag‘lub bo‘ldi. Mehmonlar tarkibida Abduqodir Husanov asosiy tarkibda maydonga tushib, himoyada ishonchli o‘yin ko‘rsatdi. Bu haqda kursiv.uz xabar beradi.
Birinchi bo‘limda jamoalar ehtiyotkor harakat qildi: zarbalar kam, darvoza sohasiga aniq yo‘llangan urinishlar deyarli bo‘lmadi. “Siti” to‘p nazoratini ushlab turgan bo‘lsa-da, “Nyukasl” jarima maydoni atrofida keskinlik yaratishga shoshilmadi. Mezbonlar esa standart vaziyatlar va Vissa hamda Gordonning tezkor hujumlari orqali javob qaytarishga urinib ko‘rdi. Eng xavfli epizodda Vissa yuqoridan zarba berib, to‘pni to‘sin ustidan oshirib yubordi.
Tanaffusdan keyin “Nyukasl” bosimni kuchaytirib, ketma-ket ikki vaziyat yaratdi: avvaliga darvozabon Trafford Vissaning to‘singa yaqin uchgan zarbasini qaytardi, oradan ko‘p o‘tmay Gimaraynsh yaqin masofadan ustunga tekkizdi. Shunga qaramay, 53-daqiqada hisobni “Siti” ochdi: chap qanotdan Doku yorib o‘tdi, uzatmani Silva davom ettirdi, hujumni esa uzoq ustunda Semenyo yakunlab qo‘ydi.
Keyinroq Semenyo to‘pni poshna bilan darvozaga yo‘llab, chiroyli gol urdi, biroq VAR Holannda ofsayd qayd etgani sababli epizod bekor qilindi. Uchrashuv yakunida Sherki yakuniy nuqtani qo‘yib, hisobni 2:0 ko‘rinishiga keltirdi. Lyuis vaqt cho‘zganligi uchun sariq kartochka oldi, ammo “Siti” ustunlikni saqlab, g‘alabani qo‘ldan chiqarmadi.
“Zamin”ni Telegramʻda oʻqing!
