Ozodbek Nazarbekov to‘yda qo‘shiq aytib, qistirilgan pullarni olganiga izoh berildi

Ijtimoiy tarmoqlarda Madaniyat vaziri Ozodbek Nazarbekov to‘y marosimida qo‘shiq kuylab, unga uzatilgan pullarni qabul qilayotgani aks etgan video keng muhokamalarga sabab bo‘ldi. Mazkur holat yuzasidan Madaniyat vazirligi rasmiy izoh berdi.

Video 2025 yil 25 oktyabr kuni vazirlik xodimlaridan birining nikoh to‘yida tasvirga olingan. Unda vazirga muxlislar tomonidan pul uzatilgani aks etgan.

Rasmiy izohda ta’kidlanishicha, ushbu holat oldindan rejalashtirilmagan. Vazirga uzatilgan pullarni qabul qilmaslik to‘y ishtirokchilari tomonidan kamsitish yoki mensimaslik sifatida qabul qilinishi mumkinligi inobatga olingan. Shu bois, yuzaga kelgan vaziyatga ijobiy munosabat bildirilgan.

Vazirlikka ko‘ra, to‘y marosimlarida xonandalarga pul qistirish amaldagi qonunchilik bilan taqiqlanmagan. Bu esa xalqimiz orasida asrlar davomida shakllangan milliy urf-odat va qadriyatlarning bir qismi hisoblanadi. O‘zbek an’analarida bu holat “orzu-havas” sifatida qabul qilinadi.

Shuningdek, rasmiylar Ozodbek Nazarbekov nafaqat vazir, balki taniqli xonanda ekanini eslatgan. U O‘zbekiston, Qoraqalpog‘iston, Tojikiston va Qirg‘iziston xalq artisti, shuningdek xizmat ko‘rsatgan madaniyat xodimi hisoblanadi. To‘yda kuzatilgan holat ham aynan uning kasbiy faoliyati bilan bog‘liq holda baholanishi lozimligi ta’kidlangan.

«Har qanday inson, egallab turgan lavozimidan qat’i nazar, o‘z tanlagan kasbidan ayro bo‘la olmaydi. Bu holat ham shu nuqtayi nazardan kelib chiqqan», deyiladi vazirlik bayonotida.

Shu bilan birga, Kun.uz'ning xabar berishicha, Korrupsiyaga qarshi kurashish agentligi mazkur holat yuzasidan Madaniyat vazirligiga taqdimnoma kiritgan.

Eslatib o‘tamiz, bu Ozodbek Nazarbekov bilan bog‘liq ilk muhokamali holat emas. 2024 yilda u Kingsman kiyim do‘koni reklamasida ishtirok etgan, 2025 yilda esa xususiy universitet reklama roligida ko‘ringan edi. O‘shanda ham vazirlik bu harakatlarda moddiy manfaatdorlik bo‘lmaganini ma’lum qilgan.