Angliya Ligasi kubogi (Karabao kubogi) yarim finalining birinchi o‘yinida “Manchester Siti” safarda “Nyukasl”ni 2:0 hisobida mag‘lub etib, javob bellashuvi oldidan o‘zini ancha erkin his qiladigan natijaga erishdi. Shovqinli stadion, jismonan baquvvat raqib va bosimga qaramay, “shaharliklar” vaziyatni nazoratda ushlab, imkoniyatlardan unumli foydalandi.
Mehmonlarning g‘alabasini Rayan Sherki hamda Antuan Semenoning bittadan goli ta’minladi. Uchrashuvda O‘zbekiston milliy terma jamoasi himoyachisi Abduqodir Husanov to‘liq 90 daqiqa harakat qildi va jamoada eng barqaror ko‘ringan o‘yinchilardan biri bo‘ldi.
Nufuzli manba — cityxtra.co.uk ekspertlari bahsdan keyin “Manchester Siti” futbolchilarining harakatlarini baholadi. Quyida o‘sha reytinglar va qisqa izohlar:
“Manchester Siti” futbolchilari baholari
Jeyms Trafford — 7,5
Turnirdagi eng yorqin seyvlardan birini amalga oshirib, Vissaning bosh bilan yo‘llagan zarbasini to‘singa tekkizib qaytardi. Umuman olganda, katta bosim bo‘lmadi, lekin o‘zi uchun ishonchli o‘yin bo‘ldi.
Mateus Nunes — 5
Tanaffus oldidan Gordonga qarshi qo‘pol harakati uchun sariq oldi. Birinchi bo‘limda ancha ishonchsiz ko‘rindi, mavsumda yaxshi o‘yinlari borligini hisobga olsak, bu unga yarashmadi.
Abduqodir Husanov — 7,5
Ayrim epizodlarda to‘p bilan ehtiyotkorlik yetmaganday tuyuldi, ammo himoyada juda mustahkam o‘ynadi. Ruben Diash va Yoshko Gvardiol yo‘qligi sezilib turgan paytda, o‘zbekistonlik himoyachi jamoa mudofaasiga katta hissa qo‘shdi.
Maks Alleyn — 7,5
20 yoshiga qaramasdan, asosiy tarkibda o‘zini juda xotirjam tutib o‘ynayapti. Gvardiolaning uni jamoada saqlab qolish istagi bejiz emasligi ko‘rindi.
Natan Ake — 6,5
Chap qanot himoyasida yana tartibli o‘yin ko‘rsatdi. Sergak harakat qildi, uning bir uzatmasi Traffordni noqulay ahvolga solib qo‘yib, deyarli avtogolga sabab bo‘layozdi.
Niko O’Rayli — 6
Joelintonni to‘pdan uzoqlashtirish paytida keraksiz sariq oldi. Shunga qaramay, markazda o‘zini yaxshi ko‘rsatib, universalligini namoyon qildi.
Bernardu Silva — 7,5
Ko‘p fol ishladi, ayrim xatolari ham bo‘ldi. Biroq baribir aqlli va foydali o‘yin ko‘rsatib, golli pas bilan jamoaga naf keltirdi.
Fil Foden — 6
Himoyaga ko‘maklashdi, ammo hujumda odatdagidek ta’sirchan bo‘lmadi. Uni almashtirish qarorini ekspertlar to‘g‘ri deb baholadi.
Antuan Semeno — 8 (o‘yinning eng yaxshi futbolchisi)
Jismoniy tayyorgarligi va harakatchanligi bilan ajralib turdi. Hushyorligi tufayli yana bir gol urdi. Ekspertlar fikricha, ikkinchi goli ham hisobga olinishi mumkin edi.
Jeremi Dok-u — 7
77-daqiqagacha “Nyukasl”ga ancha muammo tug‘dirdi. Chap qanotda juda faol harakat qilib, birinchi golga yo‘l ochgan epizodda asosiy rol o‘ynadi.
Erling Xoland — 5,5
Aniq golli imkoniyatlar ko‘p bo‘lmadi. Uning jismoniy kuchi standart vaziyatlarda foydali, ammo hozircha gollar jihatidan kutilgan samara bermayapti.
Zaxiradan tushganlar
Rayan Ayt-Nuri — 7
O‘yin oxirida raqib bosimiga qarshi to‘g‘ri harakat qildi, jamoaga xotirjamlik olib kirdi va hal qiluvchi golga assist berdi.
Rayan Sherki — 7,5
Zaxiradan tushib, juda faol ko‘rindi. Qarshi hujumlarda qatnashib, oxirgi daqiqalarda hal qiluvchi golni urdi.
Riko Lyuis — 6
O‘ng qanotda Nunesga nisbatan ishonchliroq variant ekanini ko‘rsatdi. Qolgan daqiqalarda barqaror o‘ynadi.
Rodri — 6,5
Uning maydonga tushishi “Siti”ga juda kerak edi. Markazda nazorat, xotirjamlik va to‘pni ushlab turishni ta’minladi.
Tijani Reynders — 6
Foden o‘rniga yaxshi qo‘shildi, faol harakatlari bilan bosh murabbiyga tarkib tanlashda “totli bosh og‘riq” qoldirdi.
Umumiy manzara shunday: “Siti” safardagi 2:0 hisobidagi g‘alaba bilan vazifaning yarmini bajardi. Biz uchun esa eng yoqimlisi — Husanovning 90 daqiqa davomida ishonchli o‘yini va ekspertlardan yuqori baho olgani. Shu tempda davom etsa, “shaharliklar” himoyasida “o‘z odamimiz”ning o‘rni yanada mustahkamlanadi.
“Zamin”ni Telegramʻda oʻqing!
