Madridning «Real» klubi bosh murabbiyi Alvaro Arbeloa Yevropa Chempionlar ligasida «Benfika»ga qarshi bo'ladigan bahs oldidan o'z fikrlari bilan o'rtoqlashdi. Bu haqda euro-football.ru xabar beradi.
Uchrashuv Lissabonda umumiy bosqichning so'nggi turi doirasida 28-yanvar, chorshanba kuni bo'lib o'tadi. «Burgutlar»ni hozirda Joze Mourinyu boshqarmoqda — uni yaqinda «Real»ga ehtimoliy qaytish bilan ham bog'lashgandi.
«Bizning maqsad — kuchli sakkizlikdan joy olish. «Benfika» stadioni biz, madridistlar uchun har doim alohida ahamiyatga ega bo'lib qoladi», — deya Arbeloaning so'zlarini keltiradi Madrid Xtra.
Eslatib o'tamiz, 2014-yil may oyida Lissabondagi «Eshatadiu da Lush» arenasida «Real» Chempionlar ligasini o'ninchi bor qo'lga kiritgandi: finalda «Atletiko» 4:1 hisobida mag'lub etilgan. O'sha paytda «Real» himoyachisi bo'lgan Arbeloa esa finalni zaxirada o'tkazgan.
“Zamin”ni Telegramʻda oʻqing!
