Bundesliganing 19-turida “Fryayburg” “Kyoln”ga qarshi dramatik o‘yin o‘tkazib, 2:1 hisobida g‘alaba qozondi. Bu haqda euro-football.ru xabar beradi.
Uchrashuvning 10-daqiqasida mehmonlar hisobni ochdi: Maks Rozenfelder o‘z darvozasiga to‘p kiritib qo‘ydi. Biroq “Fryayburg” tezda javob qaytardi — 11-daqiqada Yuito Sudzuki hujumni boshlab berdi, Derri Sherxant esa darvozabon ustidan to‘p oshirib, muvozanatni tikladi. Birinchi bo‘lim yakuniga yaqin, 44-daqiqada Igor Matanovich Mattias Ginter uzatmasini golga aylantirib, mezbonlarni oldinga olib chiqdi.
Ikkinchi taym o‘rtalarida “Kyoln” jarima maydonida qo‘l bilan o‘ynagani uchun penalti belgilandi. 11 metrlik zarbani tepgan Matanovich darvozabonni aldolmadi — posbon to‘pni qaytarib, uni burchak zarbasiga chiqarib yubordi.
Ushbu g‘alaba “Fryayburg”ni turnir jadvalida 7-o‘ringa olib chiqdi, “Kyoln” esa 10-pog‘onada qoldi.
“Zamin”ni Telegramʻda oʻqing!
