«Brentford»dan 55 million funt sterling evaziga «Nyukasl»ga o'tgan Yoan Vissa jamoaning afsonaviy 9-raqamli libosini tanlab, o'ziga xos jasorat ko'rsatdi. Biroq hujumchining «Sent-Jeyms Park»dagi debyut mavsumi kutilganidek kechmadi. Bu haqda Goal.com xabar beradi.
Jarohatlar va sport formasini yo'qotishi uning samaradorligiga jiddiy ta'sir ko'rsatdi.
Kongo Demokratik Respublikasi terma jamoasi safida sentyabr oyida olgan tizzasidagi jarohati Vissani uch oyga safdan chiqardi. U «Nyukasl» safidagi debyutini faqat 6 dekabr kuni o'tkazdi.
Hozirga qadar 24 ta o'yinda maydonga tushgan hujumchi bor-yo'g'i 3 ta gol urishga muvaffaq bo'ldi, ulardan faqat bittasi Premyer-liga hisobiga yozilgan.
Vissaning sobiq jamoadoshi Pol-Joze Mpoku futbolchining imkoniyatlariga ishonishini bildirdi. Uning so'zlariga ko'ra, «Nyukasl» uni bejizga sotib olmagan va hujumchi o'z sifatlarini ko'rsatish uchun moslashish davrini o'tashi kerak.
Mpoku jarohatlar adaptatsiya jarayonini qiyinlashtirganini, ammo Vissa tez orada o'z qiymatini isbotlashini ta'kidladi.
Alan Shirer kabi afsonalar kiygan 9-raqamli libosni tanlash borasidagi savolga Mpoku neytral javob berdi. Uning fikricha, Shirer baribir afsona bo'lib qoladi va har qanday yangi hujumchi bu bosimdan qo'rqmasligi lozim.
Vissa «Brentford»da 11-raqamda o'ynagan bo'lsa-da, yangi klubida mas'uliyatni o'z zimmasiga olishga qaror qilgan.
Hozirda Eddi Xau jamoasi mavsum yakuniga tayyorgarlik ko'rmoqda. Vissada o'zini ko'rsatish uchun chempionat yakunigacha to'rtta o'yin qolgan.
Navbatdagi bahs shanba kuni «Brayton»ga qarshi bo'lib o'tadi. Futbolchi to'rt yillik shartnoma imzolaganini hisobga olsak, uning kelajagi keyingi o'yinlardagi harakatlariga bog'liq bo'ladi.
“Zamin”ni Telegramʻda oʻqing!
