Taniqli aktyor va rejissyor Azamat Ahrorov hamda uning turmush oʻrtogʻi Dilnoza Ahrorova YouTube’dagi “Ikkalamiz” koʻrsatuvida ishtirok etib, uzoq yillar davomida sir saqlangan shaxsiy hayoti, oilaviy qarorlari va oʻtmishdagi xatolari haqida ochiq gapirdi.
Oila sir saqlanganining asl sababi
Aktyorning aytishicha, u oila qurganini jamoatchilikdan yashirishiga jiddiy sabab boʻlmagan. Ammo muxlislar reaksiyasi va turli gap-soʻzlardan qochish maqsadida bu qaror qabul qilingan:
— Oila qurmasdan turib ijodni boshlaganim uchun muxlislar bunga tayyor emas deb oʻyladim. Shuningdek, turli fitnalar, ortiqcha gap-soʻzlardan qochish uchun ham buni sir tutganmiz. Faqat qizli boʻlganimdan keyin ommaga oshkor qildim, — deydi u.
Toʻydagi janjal va kutilmagan voqea
Aktyor Xorazmda oʻtgan toʻy marosimi kutilmagan holat bilan yodda qolganini ham eslab oʻtdi. Uning soʻzlariga koʻra, katta toʻyda janjal kelib chiqqan va hatto pichoqbozlikkacha borgan:
— Toʻyga minglab mehmonlar kelgandi. Afsuski, ikkinchi qismida janjal chiqib ketdi. Hatto pichoq ishlatilgan holatlar boʻldi. Oʻshanda doʻstlarim bilan tezda u yerdan ketishga majbur boʻlganmiz, — deydi Ahrorov.
Aynan shu kabi holatlar ham uning oilasini maʼlum vaqt ommadan yashirishiga sabab boʻlgan.
Rafiqasining munosabati
Dilnoza Ahrorova esa bu qarorni toʻliq qoʻllab-quvvatlaganini aytdi:
— Men uchun odamlar fikridan koʻra shaxsiy hayotim muhim edi. Bir-birimizni tushunib, shunday qaror qilganmiz. Asosiysi — oila tinchligi, — deydi u.
Tanishuv va oila qurish tarixi
Juftlik kino orqali tanishgan. Azamat Ahrorov rejissyor sifatida ishlayotgan paytda Dilnoza kastingga kelgan. Keyinchalik u filmlarda ishtirok etgan va shu orqali munosabatlar rivojlangan.
— Uning xarakteri, odob-axloqi menga maʼqul kelgan. Shuning uchun oila qurishga qaror qilganman, — deydi aktyor.
Oilaviy hayot va oʻzgarishlar
Aktyor oʻz hayotidagi ayrim xato odatlardan voz kechganini ham tan oldi. Ayniqsa, farzandli boʻlgandan keyin oʻzini jiddiy oʻzgartirganini taʼkidladi:
— Qiz farzandli boʻlganimdan keyin koʻp narsalarga boshqacha qaray boshladim. Oilam uchun oʻzimni tartibga soldim, — deydi u.
Qimorga bogʻliqlik haqida ochiq gap
Shu bilan birga, u hali ham toʻliq yengolmagan odati — qimor haqida ham ochiq soʻzladi:
— Boshqa yomon odatlarni tashladim, lekin qimordan toʻliq chiqib ketish qiyin boʻlyapti. Bu men uchun jiddiy masala, — deydi aktyor.
“Zamin”ni Telegramʻda oʻqing!
