"Fenerbahche"ning sobiq futbolchisi Linkoln Joze Mourinyu bilan bog‘liq holatdan norozi ekanini bildirdi. Portugaliyalik mutaxassis Istanbul klubini 2024–2025 yillarda boshqargan. Bu haqda euro-football.ru xabar beradi.
Linkolnning aytishicha, Mourinyu unga bergan va’dasini bajarmagan va o‘zini hurmatsiz tutgan. Futbolchi ijara asosida "Hall Siti"ga ketishidan avval murabbiy bilan gaplashganini, Mourinyu esa uni Portugaliyadagi yozgi yig‘inga kutayotganini aytganini ta’kidladi.
Mavsum yakunlangach, u yig‘inga chaqiruv kutgan, biroq murabbiy bilan bog‘lanishga uringanida Mourinyu muloqot qilishdan bosh tortgan. Linkolnning so‘zlariga ko‘ra, unga sport direktoriga murojaat qilish tavsiya qilingan, keyin esa jamoa Portugaliyada bo‘lgan paytda u Istanbulga yuborilib, alohida shug‘ullanish buyurilgan.
Futbolchi buni adolatsizlik va hurmatsizlik deb baholadi: u ko‘plab uchrashuvlarda klubga yordam berish uchun bor kuchini berganini, ba’zan o‘z pozitsiyasida o‘ynamagan bo‘lsa ham vazifasini bajarganini aytdi. Shuningdek, og‘ir jarohatdan keyin qo‘llab-quvvatlash kutganini, ammo bunday yordamni his qilmaganini qo‘shimcha qildi.
Linkoln bu fikrlarni Fanatik nashriga bergan intervyusida ma’lum qildi. Hozirda Joze Mourinyu "Benfika"ni boshqarmoqda.
“Zamin”ni Telegramʻda oʻqing!
