Futbol eksperti Aleksandr Tochilin «Yevro-Futbol.Ru» nashriga bergan intervyusida FIFA prezidenti Janni Infantinoning Rossiya terma jamoalari va klublariga qoʻyilgan cheklovlarni bekor qilish haqidagi fikrlariga, shuningdek, MOK Rossiya sportiga nisbatan sanksiyalarni yaqin fursatda olib tashlashi mumkinligi haqidagi xabarlarga munosabat bildirdi. Bu haqda euro-football.ru xabar beradi.
Dunyo OAVlari Milandagi MOK yigʻilishida Rossiya sportiga qoʻyilgan barcha sanksiyalarni tez orada bekor qilish bo‘yicha prinsipial qaror pishib yetilgani haqida yozmoqda. Tochilin bunday ssenariy ro‘y berishini istashini aytdi: uning fikricha, bu mavzu uzoq vaqt davomida muhokama qilinmoqda va izolatsiyadan chiqish uchun Yevropadan aniq siyosiy-ijtimoiy qaror zarur.
Ekspertning taʼkidlashicha, yirik musobaqalar Rossiyasiz avvalgidek intriga va ommaboplikni yo‘qotadi. Shu bois u «gap amalda ham tasdiqlansa» degan umidda ekanini qo‘shimcha qildi.
Infantino Rossiya ishtirokiga qo‘yilgan taqiqni «mazmunsiz» deb atagani haqida to‘xtalgan Tochilin bu bayonotni dunyoda vaziyat o‘zgarib borayotgani bilan izohladi. U Rossiyaga nisbatan ikki xil standart va biryoqlama yondashuv ko‘ringanini, ammo vaqt o‘tishi bilan taqiqning o‘zi ham mantiqsiz holat ekani anglashilayotganini aytdi.
Tochilinga ko‘ra, agar MOK sanksiyalarni bekor qilsa, bu futbolga ham bevosita taʼsir ko‘rsatishi mumkin. U buni «zanjirli reaksiya» deb atab, MOK kabi yirik tuzilma precedent yaratsa, FIFA va UEFA singari boshqa tashkilotlar ham avvalgi qarorlarini qayta ko‘rib chiqishga majbur bo‘lishini taʼkidladi.
Infantino kelajakda jamoalarni siyosat sabab chetlatishni qonunan taqiqlash kerakligini ham aytgandi. Tochilin esa sportning asosiy shiori siyosatdan xoli bo‘lishi ekani, Rossiya bo‘yicha qabul qilingan qarorlar esa aynan shu tamoyilga zid ko‘rinishini bildirdi.
Shuningdek, OAVlarda FIFA aprel oyidagi kongressda Rossiyaning xalqaro turnirlarga to‘liq qaytishi masalasini muhokama qilishi mumkinligi yozilmoqda. Tochilin bunday muddatlarda qaytish ehtimolini inkor etmadi va bu kabi maʼlumotlar «asossiz paydo bo‘lmaydi» degan fikrni ilgari surdi.
Ekspert Rossiya qaytgan taqdirda ham ayrim raqiblar maydonga tushishdan bosh tortishi mumkinligini tan oldi. Uning aytishicha, bunday vaziyatda har bir tashkilot o‘z reglamentiga tayanib ish ko‘rishi, qoidani buzganlarga intizomiy choralar qo‘llashi kerak; texnik mag‘lubiyatlar berilishi boshqalarga ham «bunday demarshlar foyda keltirmaydi» degan signal bo‘ladi.
“Zamin”ni Telegramʻda oʻqing!
