Qozog‘iston poytaxti Astana shahrida Turkiy davlatlar shaxmat forumi doirasida “Turkic Team Chess Championships 2026” xalqaro musobaqasi start oldi. 13–17 may kunlari o‘tkaziladigan ushbu nufuzli bellashuvda erkaklar va ayollar jamoalari g‘oliblik uchun dona suradi.
Musobaqa turkiy davlatlar shaxmatchilari uchun muhim maydon bo‘lib, unda nafaqat sport natijalari, balki hamkorlik, tajriba almashish va shaxmat maktablari o‘rtasidagi aloqalarni kuchaytirish masalalari ham alohida ahamiyat kasb etadi.
Turnirning umumiy mukofot jamg‘armasi 42 ming AQSH dollarini tashkil etadi. Erkaklar va ayollar yo‘nalishida g‘olib chiqqan jamoalarning har biri 21 ming AQSH dollari miqdoridagi mukofotga ega bo‘ladi. Bu esa musobaqa nufuzi va raqobat darajasi ancha yuqori ekanini ko‘rsatadi.
O‘zbekiston erkaklar terma jamoasi tarkibida tajribali va kuchli shaxmatchilar jamlangan. Jamoa safida grossmeysterlar Abdimalik Abdisalimov, Jahongir Vohidov, Ortiq Nigmatov, shuningdek, xalqaro sport ustalari Saidakbar Saidaliyev va Asrorjon Omonov ishtirok etmoqda.
Erkaklar terma jamoasi tarkibi:
Abdimalik Abdisalimov — grossmeyster, 2530 reyting
Jahongir Vohidov — grossmeyster, 2515 reyting
Ortiq Nigmatov — grossmeyster, 2470 reyting
Saidakbar Saidaliyev — xalqaro sport ustasi, 2454 reyting
Asrorjon Omonov — xalqaro sport ustasi, 2345 reyting
Ayollar terma jamoasi ham kuchli tarkib bilan musobaqaga kirishmoqda. O‘zbekiston sharafini Afruza Hamdamova, Umida Omonova, Guldona Karimova, Madinabonu Xalilova va Asal Salimova himoya qiladi. Bu tarkibda yoshlik, tajriba va katta maqsadlar uyg‘unlashgan.
Ayollar terma jamoasi tarkibi:
Afruza Hamdamova — ayollar xalqaro grossmeysteri, 2423 reyting
Umida Omonova — ayollar xalqaro grossmeysteri, 2357 reyting
Guldona Karimova — ayollar xalqaro sport ustasi, 2279 reyting
Madinabonu Xalilova — ayollar FIDЕ sport ustaligiga nomzod, 2226 reyting
Asal Salimova — ayollar FIDЕ sport ustasi, 2144 reyting
Turkiy davlatlar shaxmat forumi doirasida 6 davlat federatsiyalari o‘rtasidagi aloqalarni yangi bosqichga olib chiqish, qo‘shma loyihalarni rivojlantirish va shaxmat sohasida o‘zaro tajriba almashish masalalariga ham katta e’tibor qaratilmoqda.
Bu kabi musobaqalar yosh shaxmatchilar uchun ham katta ruhiy turtki beradi. Chunki xalqaro jamoaviy bellashuvlar nafaqat reyting va mukofot, balki xarakter, jamoaviylik va katta sahnada o‘zini ko‘rsatish imkoniyatidir.
Qisqasi, Astanadagi turnir o‘zbek shaxmati uchun yana bir muhim sinov maydoni bo‘ladi. Terma jamoalarimiz tarkibi kuchli, maqsad esa aniq — turkiy davlatlar orasida munosib natija ko‘rsatish va yurtimiz shaxmat maktabining salohiyatini yana bir bor namoyish etish.
“Zamin”ni Telegramʻda oʻqing!
